काठमाडौं । चितवनको भरतपुरमा जारी राष्ट्रिय स्वतन्त्र पार्टी (रास्वपा)को महाधिवेशनमा प्रतिनिधिहरूको सहभागिता अपेक्षाभन्दा उल्लेख्य रूपमा बढेको छ।
महाधिवेशनको पछिल्लो अवस्थाबारे जानकारी दिँदै रास्वपाका सांसद तथा नेता मनिष झाले सुरुमा करिब ३ हजार प्रतिनिधि सहभागी हुने अनुमान गरिए पनि हालसम्म ४ हजार ३ सयभन्दा बढी प्रतिनिधि सहभागी भइसकेको जानकारी दिए।
उनका अनुसार प्रतिनिधिको सङ्ख्या ४ हजार ५ सयसम्म पुग्न सक्ने सम्भावना रहेको छ
‘सुरुमा ३ हजार प्रतिनिधिको आकलन गरिएको थियो। तर अहिले ४ हजार ३ सयभन्दा बढी प्रतिनिधि सहभागी भइसकेका छन् र यो सङ्ख्या ४ हजार ५ सयसम्म पुग्न सक्छ,’ झाले भने।
उनले प्रवासबाट समेत अपेक्षाभन्दा धेरै प्रतिनिधिहरू महाधिवेशनमा सहभागी भएको उल्लेख गर्दै विदेशस्थित संगठनहरूबाट अनुमान गरिएकोभन्दा करिब चार गुणा बढी प्रतिनिधिको उपस्थिति रहेको बताए।
