काठमाडौँ। नेपाली कम्युनिस्ट पार्टीका नेता वर्षमान पुनले जनताका मुद्दामा खरो उत्रिने र अन्यायका विरुद्ध लड्ने राजनीतिक शक्तिलाई मात्रै जनमत प्राप्त हुने बताउनुभएको छ ।
शनिवार पेरिसडाँडामा आयोजित एक कार्यक्रमलाई सम्बोधन गर्दै नेता पुनले नेपाली जनताको मनोविज्ञान सधैँ विसंगति र बेथितिका विरुद्ध लड्ने शक्तिको पक्षमा रहेको उल्लेख गर्नुभएको हो । उहाँले पछिल्लो निर्वाचनमा नयाँ शक्तिका रूपमा उदाएको राष्ट्रिय स्वतन्त्र पार्टी (रास्वपा) ले पाएको जनमतलाई पनि यसैको उदाहरणका रूपमा प्रश्तुत गर्नुभयो ।
देशमा अझै पनि गरिबी, शोषण, अन्याय र विभेदका खाडलहरू कायमै रहेको चर्चा गर्दै उहाँले राष्ट्रियताको मामिलामा समेत सरकारको भुमिकामाथि प्रश्न उठाउनु भयो । भारतसँगको सीमा विवादका विषयमा देशभक्त जनता सडकमा आउनुपर्ने र राष्ट्रका पक्षमा लड्नेहरू नै वर्तमान सरकारको विकल्प बन्नसक्ने उहाँको दाबी थियो । पछिल्लो समय युनियनहरू खारेज गर्ने तयारी भइरहेको प्रति असन्तुष्टि व्यक्त गर्दै नेता पुनले यसलाई अभिव्यक्ति स्वतन्त्रता र संवैधानिक हकमाथिको प्रहारका रूपमा चित्रण गर्नुभयो ।
उहाँले भन्नुभयो, ‘मान्छेले के बुझे भने यो नयाँ शक्ति शासन सत्ताका विरुद्ध लड्छ, त्यसैले उसलाई भोट दिए । नेपाली जनताले सधैँ लड्ने शक्तिलाई नै विश्वास गर्दा रहेछन् भन्ने यो एउटा स्पष्ट मनोविज्ञान हो । युनियन बनाउन पाउनु संवैधानिक अधिकार हो । यदि यस्ता अधिकार खोसिँदा पनि हामी चुपचाप बस्यौँ भने जनताले हामीलाई विश्वास गर्ने छैनन् । विगतमा राजा ज्ञानेन्द्रले सत्ता हातमा लिँदा खुशी मनाउनेहरूले नै पछि उनलाई सडकबाटै विस्थापित गरेको इतिहास हामीले बिर्सनु हुँदैन । हिजो हामी सशस्त्र सङ्घर्ष र जनआन्दोलनबाट लडेर आएका हौँ । अब फेरि राष्ट्रियता, लोकतन्त्र र जनताको पक्षमा उभिएर समाजवादी क्रान्तिको आधार तयार पार्न हामी प्रतिवद्ध छौँ ।’
वर्तमान सरकारको कार्यशैलीप्रति टिप्पणी गर्दै उहाँले संसदलाई बेवास्ता गर्ने र बहुमत हुँदाहुँदै पनि अध्यादेशमार्फत शासन चलाउन खोज्ने प्रवृत्ति देखिएको आरोप लगाउनु भयो ।
सरकार गठन भएको १०० दिन नपुगेका कारण अहिले नै पूर्ण मूल्याङ्कन नगरे पनि राष्ट्रघात र जनघातका मामिलामा मौन बस्न नसकिने उहाँको स्पष्टोक्ति थियो । पार्टीको आगामी कार्यदिशाबारे बोल्दै नेता पुनले वैचारिक, राजनीतिक र साङ्गठनिक रूपमा सशक्त भएर अगाडि बढ्नुपर्नेमा जोड दिनुभयो । –न्युज एजेन्सी नेपाल
