काठमाडौँ। स्वतन्त्र ऊर्जा उत्पादकहरूको संस्था, नेपाल (इप्पान) का नवनिर्वाचित अध्यक्ष मोहन डाँगीले निजी क्षेत्रमैत्री विद्युत ऐनका लागि पहल गर्ने बताउनुभएको छ ।
बुधवार संस्थाको कार्यालयमा कार्यभार सम्हाल्दै उहाँले यस्तो प्रविद्धता जनाउनुभएको हो । उहाँले निजी क्षेत्रका समस्या समाधान र नीतिगत सुधारका लागि सक्रिय पहल गर्ने बताउनु भयो ।
उहाँले आफ्नो कार्यकालमा गरिएका प्रतिवद्धताहरूलाई कार्यसमितिबाट पारित गराई व्यवस्थित रूपमा कार्यान्वयन गर्ने बताउनु भयो । अध्यक्ष डाँगीले ऊर्जा क्षेत्रमा विद्यमान समस्याहरूलाई राष्ट्रिय स्तरमा मन्त्रालयसँगको सहकार्य र छलफलबाट समाधान गरिने उल्लेख गर्नुभयो ।
विशेष गरी पछिल्लो समय चर्चामा रहेको १३०० मेगावाटका आयोजनाहरू खारेज हुनसक्ने विषयमा मन्त्रालयसँग आवश्यक संवाद गरी निजी क्षेत्रको हितमा काम गर्ने उहाँको भनाइ थियो ।
विगतका अध्यक्षहरू शैलेन्द्र गुरागाईं, कृष्ण आचार्य र निवर्तमान अध्यक्ष गणेश कार्कीसँग निकट रहेर काम गरेको अनुभवका आधारमा आफूलाई आयोजनाका सर्वेक्षण, निर्माण र उत्पादनका तीनवटै चरणमा भोग्नुपर्ने समस्याबारे पूर्ण जानकारी रहेको उहाँले बताउनु भयो ।
इप्पानमा करिव २५ प्रतिशत सदस्यहरू सौर्य ऊर्जा (सोलार) सँग सम्बन्धित रहेको उल्लेख गर्दै उहाँले सोलार ऊर्जाका समस्या समाधानमा पनि उत्तिकै प्राथमिकता दिने स्पष्ट पार्नुभयो ।
मुलुकमा हाल २०४९ सालको विद्युत ऐन कार्यान्वयनमा रहेको र लामो समयदेखि नयाँ ऐन ल्याउने प्रयास भएपनि सफल हुन नसकेको भन्दै उहाँले यसपटक दुई तिहाइ नजिकको सरकार भएकाले नयाँ ऐन ल्याउन लबिङ्ग गर्ने बताउनु भयो । उक्त ऐनलाई निजी क्षेत्रमैत्री बनाउन आफ्नो तर्फबाट विशेष प्रयत्न रहने उहाँको भनाइ छ ।
उहाँले भन्नुभयो, ‘हामीले हाम्रो कार्यकालमा के–के गर्ने भन्ने विषयमा प्रतिवद्धता जाहेर गरेका छौैँ । ती प्रतिवद्धताहरूलाई व्यवस्थित रूपमा सूचीवद्ध गरी कार्यसमितिबाट पारित गराउनेछौँ र सोही अनुसार अगाडि बढ्नेछौँ ।
अहिले समस्याहरू धेरै छन् । ती समस्याहरूलाई व्यापक रूपमा राष्ट्रिय स्तरमा सम्बोधन गर्न मन्त्रालयसँग पनि निरन्तर छलफल भइरहेको छ । सहकार्य र संवादमार्फत समाधान खोज्ने हाम्रो प्रयास रहनेछ । यसैबीच करिव १,३०० मेगावाट क्षमताका आयोजनाहरू खारेज गर्ने विषय पनि उठिरहेको छ ।
यी लगायत समग्र विषयमा म तीन जना अध्यक्षहरूसँग नजिक भएर काम गरिसकेको व्यक्ति हुँ । शैलेन्द्र गुरुङज्यूको कार्यकालदेखि म इपानमा सक्रिय हुन थालेको हुँ । त्यसपछि कृष्ण आचार्यज्यू तथा निवर्तमान अध्यक्ष गणेश कार्कीज्यूसँग पनि नजिक रहेर काम गर्ने अवसर पाएँ ।
त्यसैले समस्याहरू कहाँ छन्, के–के छन् र तिनको समाधान कसरी गर्न सकिन्छ भन्ने विषयमा मलाई पर्याप्त जानकारी छ । अर्को कुरा, हाम्रा आयोजनाहरू मुख्यतः तीन चरणमा हुन्छन्–सर्वेक्षण, निर्माण र उत्पादन । यी प्रत्येक चरणमा फरक–फरक प्रकारका समस्याहरू छन् । साथै, हाल इपानका सदस्यहरूमध्ये उल्लेखनीय संख्या सौर्य ऊर्जासँग सम्बन्धित हुनुहुन्छ । यकिन तथ्यांक अहिले मसँग छैन, तर करिब २५ प्रतिशत सदस्यहरू सोलार क्षेत्रका हुनुहुन्छ ।
सोलार क्षेत्रका समस्यादेखि अन्य सबै समस्यासम्मका विषयमा म पहिलेदेखि नै सक्रिय रूपमा लागिरहेको हुँदा सबै पक्षबारे जानकार छु । त्यसैले सबै समस्याको समाधान गर्ने दिशामा काम गर्नेछौँ । विशेषगरी, २०४९ सालमा आएको विद्युत ऐनकै आधारमा हामीले अहिलेसम्म काम गरिरहेका छौँ । नयाँ विद्युत ऐन पटक–पटक आउने चर्चा भए पनि अन्तिम चरणमा पुगेर पनि पारित हुन सकेको छैन । गत कार्यकालमा पनि लगभग पारित हुने अवस्थामा पुगेको थियो, तर रोकियो ।
अहिले दुईतिहाइ नजिकको सरकार भएकाले ऐन–कानुन निर्माणको प्रक्रिया अघि बढ्ने अपेक्षा छ । त्यसकारण हामी निजी क्षेत्रमैत्री विद्युत ऐन निर्माणका लागि आवश्यक लबिङ गर्नेछौँ र यसलाई निजी क्षेत्रको हितअनुकूल बनाउन हरसम्भव प्रयास गर्नेछौँ । यहाँहरूको साथ र सहयोगको अपेक्षा गर्दछु । विशेषगरी निवर्तमान अध्यक्षज्यूको कार्यकालमा इपानको राष्ट्रिय तथा अन्तर्राष्ट्रिय स्तरमा व्यापक ब्राण्डिङ भएको छ । त्यो प्रतिष्ठा र साखलाई जोगाउँदै अझ सुदृढ बनाउने दिशामा हामी अघि बढ्नेछौँ ।’
संस्थालाई सामूहिक नेतृत्वको भावना अनुरूप कार्यविभाजन गरी अगाडि बढाउने बताउँदै उहाँले सञ्चार क्षेत्रको साथ र सहयोगका लागि पत्रकारहरूप्रति आभार समेत व्यक्त गर्नुभयो । –न्युज एजेन्सी नेपाल
