काठमाडाैँ । संस्कृति, पर्यटन तथा नागरिक उड्डयनमन्त्री खडकराज पौडेलले नेपाल वायुसेवा निगमलाई माथि उकास्नका लागि उपयुक्त मोडलको खोजी भइरहेको बताउनुभएको छ ।
निगम दुर्गतिमा फसेको उल्लेख गर्दै उहाँले त्यसलाई उकास्नका लागि सरकारले संरचनागत रुपमा नै आमूल सुधार गर्नका लागि राष्ट्रिय बहसमार्फत उपयुक्त मोडलको खोजी गरिरहेको स्पष्ट पार्नुभयो ।
बुधवार प्रतिनिधि सभा बैठकमा आफनो मन्त्रालयको विनियोजन शीर्षकमाथिको सांसदहरुले उठाएका प्रश्नको जवाफ दिने क्रममा मन्त्री पौडेलले निगम पखेटा घाइते भएका चराजस्तो भएको उल्लेख गर्दै त्यसलाई सुधारको बाटोमा अघि बढाउनका लागि सरकार प्रयासरत रहेको बताउनु भयो ।
उहाँले भन्नुभयो,‘नेपाल वायु सेवा निगमको विषममा पनि सुन्दर कुरा उठाइएकोछ । त्यहाँको समस्या बजेटले सम्बोधन गर्ने विषय होइन । तर हामीले नियमन र अनुगमन भने गर्दछौँ । हामीले चुनाव भन्दा अगाडि पनि र चुनाव भन्दा पछाडि पनि र सरकार गठन भएपछि पनि, सरकारको नीति तथा कार्यक्रममा पनि सम्बोधन गरेको विषय के हो भने नेपाल वायु सेवा निगमको अव सुदृढिकरण गर्नु पर्दछ । त्यसलाई जुनसुकै मोडलमा एउटा राष्ट्रिय ध्वजाबाहकको दुर्गती हुँदै गईरहेको छ । ६५ अर्व भन्दा बढिको ऋण छ । वर्षैपिच्छे २ अर्वभन्दा बढि ऋण थपिएको थपिएको नै छ ।’
मन्त्री पौडेलले सरकारले निजी क्षेत्रसहितको सहभागितामा नेपाल वायुसेवा निगमलाई उकास्ने गरी योजना तर्जुमा गर्ने कामलाई अघि बढाएको पनि बताउनु भयो ।
