काठमाडौं । अर्थमन्त्री स्वर्णिम वाग्लेले केवल नगद वितरणका कार्यक्रमले मात्रै गरिबी न्यूनीकरण हुन नसक्ने बताउनुभएको छ । उहाँले सरकारले आगामी आर्थिक वर्षको बजेटमा आयआर्जन र रोजगारी सिर्जनालाई प्राथमिकता दिएको स्पष्ट पार्नुभयो ।
बिहीवार बसेको प्रतिनिधिसभा बैठकमा सांसदहरूले उठाएका प्रश्नको जवाफ दिँदै अर्थमन्त्री वाग्लेले सरकारले विद्यमान सामाजिक सुरक्षा कार्यक्रममध्ये कुनै पनि कटौती नगरेको, बरु केही कार्यक्रमलाई थप विस्तार गरिएको जानकारी दिनुभयो । उहाँले मानिसलाई सधैं सहायता लिने अवस्थामा राख्नेभन्दा आम्दानी आर्जन गर्न सक्षम बनाउने लक्ष्यसहित बजेट ल्याइएको बताउनुभयो ।
गरिबी न्यूनीकरणको सबैभन्दा प्रभावकारी उपाय स्थायी रोजगारी र आयआर्जनका अवसर सिर्जना गर्नु रहेको उल्लेख गर्दै उहाँले कृषि, उद्यमशीलता र निजी क्षेत्रलाई सशक्त बनाएर रोजगारी वृद्धि गर्ने नीति लिइएको बताउनुभयो । सरकारले आर्थिक नीति निर्माणमा निजी क्षेत्रसँगको सहकार्यलाई केन्द्रमा राखेको पनि उहाँको भनाइ थियो ।
अर्थमन्त्री वाग्लेले राज्यले सबै काम आफैं गर्ने वा निजी क्षेत्रलाई शंकाको दृष्टिले हेर्ने पुरानो सोच त्यागिएको बताउनुभयो । साथै बजारले मात्रै सबै समस्या समाधान गर्न सक्छ भन्ने अतिवादी दृष्टिकोणबाट पनि सरकार टाढा रहेको उहाँको भनाइ थियो ।
उहाँले बजारको निर्माण, नियमन र स्थायित्व सुनिश्चित गर्ने जिम्मेवारी राज्यकै भएको उल्लेख गर्दै प्रतिस्पर्धात्मक अर्थतन्त्रमार्फत समतामूलक समृद्धि हासिल गर्न बलियो राज्य आवश्यक पर्ने बताउनुभयो । नियामकीय निकायहरूलाई थप सुदृढ बनाउने नीति सरकारले लिएको पनि उहाँले जानकारी दिनुभयो ।
विगतमा नियामकीय अभ्यास विकृत बन्दा ‘क्रोनी क्यापिटलिज्म’ र आर्थिक कब्जाजस्ता प्रवृत्ति देखिएको उल्लेख गर्दै अर्थमन्त्री वाग्लेले त्यस्ता विकृतिको अन्त्य गर्दै सक्षम राज्य र गतिशील निजी क्षेत्रबीचको सहकार्यमा आधारित आर्थिक प्रणाली विकास गरिने बताउनुभयो । उहाँले प्रतिस्पर्धात्मक अर्थतन्त्र र प्रभावकारी नियमनमार्फत समतामुखी समृद्धि हासिल गर्ने सरकारको लक्ष्य रहेको स्पष्ट पार्नुभयो ।
