काठमाडौँ । अर्थमन्त्री डा. स्वर्णिम वाग्लेमाथि उठेको करका दर हेरफेरसम्बन्धी विवादबीच सरकारका प्रवक्ता एवं शिक्षा तथा खेलकुदमन्त्री सस्मिता पोखरेलले अर्थमन्त्रीको बचाउ गर्दै सरकारको पूर्ण समर्थन रहेको स्पष्ट गर्नुभएको छ ।
मंगलवार मन्त्रीपरिषद्को निर्णय सार्वजनिक गर्ने क्रममा पत्रकारहरूसँग कुरा गर्दै प्रवक्ता पोखरेलले अर्थमन्त्री डा. स्वर्णिम वाग्लेले बजेट निर्माणमा “एकदमै मेहनत” गरेको उल्लेख गर्दै सरकारले पूर्ण रूपमा साथ दिएको बताउनुभयो ।
उहाँले करका नीति फेरबदलसम्बन्धी कुनै विषय मन्त्रीपरिषद्मा औपचारिक रूपमा नउठेको पनि जानकारी दिनुभयो । उहाँका अनुसार, अर्थमन्त्रीले प्रस्तुत गरेको बजेटमा सरकारको साझा सहमति रहेको छ ।
उहाँले भन्नुभयो, “अर्थमन्त्रीज्युले एकदमै मेहनत गरेर बजेट ल्याउनुभएको छ, त्यसमा हाम्रो पूर्ण समर्थन छ।”
यसअघि अर्थमन्त्री वाग्लेले आर्थिक विधेयक संसदमा पेश गरेपछि संसदलाई जानकारी नै नदिइ करका दर हेरफेर गरेको भन्दै विवाद उत्पन्न भएको थियो । विपक्षी दलहरूले स्वार्थ समूहसँग मिलेमतो गरी करका दर परिवर्तन गरिएको आरोप लगाउँदै छानबिनको माग गरेका छन् ।
विवाद चर्किँदै जाँदा सरकार पक्षले भने अर्थमन्त्रीको कदमलाई नियमित बजेट प्रक्रियाअनुसारको भन्दै बचाउ गरेको छ ।
