काठमाडौँ। लेखक तथा साहित्यकार खुशीराम डौलियाद्वारा लिखित २० कृतिको आज एकैपटक विमोचन गरिएको छ ।
मर्स्याङ्दी वाङमय प्रतिष्ठानले आज यहाँ आयोजना गरेको कार्यक्रममा प्राध्यापनसँगै साहित्य क्षेत्रमा लाग्नुभएका लमजुङ सुन्दरबजार नगरपालिका–९ फेदीकुनाका डौलियाका विभिन्न विधाका २० कृति एकैपटक विमोचन गरिएको हो ।
नेपाल प्रज्ञा–प्रतिष्ठानमा आयोजित कार्यक्रममा डौलियाका १८ र डौलिया प्रकाशक रहेको अनन्तविजय डौलिया र विष्णु गुरुङ (प्यासी) का एक–एक कृति गरी कुल २० वटा पुस्तक एकैसाथ सार्वजनिक गरिएको हो ।
विमोचन गरिएका कृतिमा कविता, कथा, नियात्रा, उपन्यास र जीवनीलगायत रहेका छन् । साहित्यकार डौलियाका विमोचन गरिएका कृतिमा सुगन्ध (कथा सङ्ग्रह), हलेसीदेखि मुक्तिनाथ (यात्रा संस्मरण), बाध्यता (सामाजिक उपन्यास), बस्तीभित्रका हस्तीहरू (सङ्क्षिप्त जीवनी), पर्खालभित्र (कविता सङ्ग्रह), अन्तरमनका आवाज/धुन (कविता सङ्ग्रह), जीवनको परिभाषा (कविता सङ्ग्रह) छन् ।
यस्तै, अन्त्यहीन यात्रा, प्रशान्तका छाल, अन्तिम सङ्कल्प, बाटो भुलेको यात्री, मौन आकाश, अस्तित्व, उज्यालोको खोजी, रित्तो सहर, उपहार, सम्बन्ध र जलेको मन (कविता सङ्ग्रह) रहेका छन् । अनन्तविजय डौलियाको बालसाहित्य दोस्ती र विष्णु गुरुङ (प्यासी)को कवितासङ्ग्रह वनपाखाका फूल रहेका छन् ।
उक्त कृतिको संयुक्त राष्ट्रसङ्घका पूर्वराजदूत प्रा डा जयराज आचार्य, प्रा डा विद्यानाथ कोइराला, प्रा डा भागवत ढकाल, प्रा डा भागेश्वरी पङ्गेनी र मस्र्याङ्दी वाङ्मय प्रतिष्ठानका अध्यक्ष विजयराज न्यौपानेलगायतले विमोचन गर्नुभयो ।
कार्यक्रममा संयुक्त राष्ट्रसङ्घका पूर्वराजदूत प्रा डा आचार्यले गण्डक क्षेत्र साहित्य र लोकसंस्कृतिको धनी भएको बताउनुभयो । उहाँले मस्र्याङ्दी नदी जस्तै साहित्यकार डौलियाका कृति बहेको भन्दै खुसी व्यक्त गर्नुभयो । नेपाली साहित्यको इतिहासमा यति धेरै कृति एकैपटक सार्वजनिक हुनु आफैँमा एउटा महत्त्वपूर्ण उपलब्धि भएको उहाँको भनाइ छ ।
साहित्यकार डौलियाको यसअघि प्रतिक्षा (लघुउपन्यास), समयका छाल (कविता सङ्ग्रह), मातृभूमि (कवितासङ्ग्रह), समयको बेग (कविता सङ्ग्रह), समयको आवाज (कविता सङ्ग्रह), समुन्द्रपारी (यात्रा संस्करण), सुखद मिलन (उपन्यास), डौलिया वंशावली र सीमित आकाश (कविता सङ्ग्रह) प्रकाशन भइसकेका छन् ।
डौलियाले विसं २०७१ मा तीन वटा र विसं २०८१ मा ६ वटा कृति प्रकाशनमा ल्याउनुभएको थियो । आज विमोचन भएका कृतिसहित साहित्यकार डौलियाको कृतिको सङ्ख्या २९ पुगेको छ । रासस
