काठमाडौं । राष्ट्रिय प्रजातन्त्र पार्टीका अध्यक्ष कमल थापा सप्ताहव्यापी चीन भ्रमण सम्पन्न गरी आज स्वदेश फर्कनुभएको छ । आइटिएफ ग्रेड वान टुर्नामेन्टअन्तर्गत आइटिएफ सेनजेन सिनियर्स सर्किट २०१९ प्रतियोगितामा भाग लिन यही कात्तिक ८ गते चीन गएका थापाले टेनिस प्रतियोगिताको पहिलो खेलमा जित्नुभएको थियो, भने दोस्रो खेलमा अग्रता कायम रहँदारहँदै अस्वस्थ्यताका कारण खेल छोडनुभएको थियो । अध्यक्ष थापालाई खुट्टाको पिडौंला र तिघ्रामा समस्या आई ढाडसम्म समस्या बढेकामा अहिले स्वास्थ सामान्य रहेको पार्टीले जनाएको छ ।
यसैबीच राष्ट्रिय प्रजातन्त्र पार्टी (संयुक्त)का अध्यक्ष पशुपतिशम्शेर जबरा पनि आज स्वदेश फिर्ता हुनुभएको नेता राजाराम श्रेष्ठले जानकारी दिनुभयो । गत असोज १८ गते निजी भ्रमणमा बेलायत जानुभएका राणालाई विमानस्थलमा नेता तथा कार्यकर्ताले स्वागत गरेका थिए । दुबै पार्टीको एकताका लागि अनौपचारिक प्रयास भइरहेको जनाइएको छ ।
