काठमाडाैँ । निर्वाचन आयुक्त सगुनशमशेर राणाले प्रश्तावित निर्वाचनसम्बन्धी कानूनलाई संशोधन र एकीकरण गर्न बनेको विधेयकको पारित भए निर्वाचन प्रणालीमा देखिएका करिव ९० प्रतिशत समस्या समाधान हुने बताउनुभएको छ ।
शुक्रवार काठमाडौंमा आयोजित एक कार्यक्रममा बोल्दै उहाँले यस्तो बताउनुभएको हो । उहाँले निर्वाचन आयोगले निर्वाचनसम्बन्धी कानूनलाई संशोधन र एकीकरण गर्न बनेको विधेयकको मस्यौदा गृह मन्त्रालयमा फेरि पठाएको जानकारी दिँदै उक्त विधेयक, २०८४ सालको प्रदेश र स्थानीय तह निर्वाचनभन्दा पहिले पारित हुनुपर्नेमा जोड दिनुभयो । उहाँले विगतमा समेत निर्वाचनसम्बन्धी कानूनलाई संशोधन गर्ने विधेयक गृहमा पठाएको भएपनि संसदमा पेश हुनै नसकेको उल्लेख गर्नुभयो ।
उहाँले भन्नुभयो, ‘अब छिट्टै २०८४ सालमा प्रदेश र स्थानीय तहको निर्वाचन आउँदैछ । उक्त निर्वाचनको तयारीस्वरुप हामीले कानून बनाउनुपर्छ । अहिले भर्खरै पनि हामीले निर्वाचनसम्बन्धी कानूनलाई संशोधन र एकीकरण गर्न बनेको विधेयकको मस्यौदा गृह मन्त्रालयमा फेरि पठाएका छौँ । विगत पनि पठाएका थियौँ, संसदमा जान सकेन । यो पटक संसदबाट पास हुने विश्वास छ । यो विधेयक पास भयो भने अहिलेको निर्वाचनसम्बन्धीका ९० प्रतिशत समस्या हल गर्छ । हामीले त उहिल्यै विधेयकको मस्यौदा पठाएको हो भएन । यो पटक विधेयकमाथि विचार विमर्श भइदियोस् भन्ने हाम्रो कामना छ ।’
उहाँले २०८२ फागुन २१ मा सम्पन्न प्रतिनिधि सभा सदस्य निर्वाचन विभिन्न कोणबाट ऐतिहासिक भएको पनि बताउनु भयो । उहाँले निर्वाचनको क्रममा दलहरुले भौतिक रुपमाभन्दा बढी सामाजिक सञ्जालमार्फत निर्वाचन आचारसंहित उल्लङ्घन गरेको समेत बताउनु भयो ।
