काठमाडाैँ । नेपाल समूह ‘ए’ को विजेता बन्दै एसियन गेम्स पुरुष क्रिकेट प्रतियोगितामा छनोट भएको छ। सिङ्गापुर राष्ट्रिय क्रिकेट स्टेडियममा बिहीबार भएको खेलमा नेपालले मलेसियालाई १६७ रनको फराकिलो अन्तरले पराजित गर्दै लगातार दोस्रो जित दर्ता गरेको हो। यसअघि पहिलो खेलमा नेपालले चीनलाई २२१ रनले हराएको थियो।
टस हारेर पहिले ब्याटिङ गरेको नेपालले २० ओभरमा ७ विकेटको क्षतिमा २७५ रनको विशाल स्कोर बनाएको थियो। नेपालको इनिङ्समा कुशल भुर्तेलले उत्कृष्ट शतक प्रहार गर्दै १२६ रनको योगदान दिए। उनले ५४ बलमा १४ चौका र ८ छक्का प्रहार गर्दै आक्रामक ब्याटिङ प्रदर्शन गरे। यो प्रतियोगितामा उनको यो लगातार दोस्रो शतक हो भने टी–२० करियरको तेस्रो शतक समेत हो। साथै, उनी लगातार दुई खेलमा शतक बनाउने पहिलो नेपाली खेलाडी बनेका छन्।
त्यस्तै, आसिफ शेखले पनि विस्फोटक ब्याटिङ गर्दै ६८ रन जोडे। उनले २४ बलमा ५ चौका र ७ छक्का प्रहार गरे। कप्तान दीपेन्द्र सिंह ऐरीले ३१ रनको योगदान दिए भने सन्दीप जोरा १५, लोकेश बम १० र कुशल मल्ल अविजित ९ रनमा रहे।
मलेसियाका तर्फबाट भिरनदीप सिंहले ३ विकेट लिए भने विजय उनई र कप्तान सयद अजिजले २–२ विकेट हात पारे।
२७६ रनको विशाल लक्ष्य पछ्याएको मलेसिया २० ओभरमा ९ विकेट गुमाएर १०८ रनमै समेटियो। मलेसियाका कप्तान सयद अजिजले ५४ रनको अर्धशतकीय इनिङ्स खेले पनि अन्य ब्याटरले उल्लेखनीय प्रदर्शन गर्न सकेनन्। उनले ४५ बलमा ६ चौका र २ छक्का प्रहार गरे। शर्विन मुनियान्डीले १८ रन र मोहम्मद हाजिकले १३ रन बनाए भने बाँकी खेलाडी दोहोरो अंकमा पुग्न सकेनन्।
नेपालका शेर मल्लले ३ विकेट लिए भने सन्दीप लामिछाने, सोमपाल कामी, करण केसी, दीपेन्द्र सिंह ऐरी र कुशल मल्लले १–१ विकेट लिए।
यो जितसँगै नेपाल समूह विजेता बनेर एसियन गेम्समा स्थान सुरक्षित गरेको छ। मलेसिया पनि यसअघि नै छनोट भइसकेको थियो भने लगातार दोस्रो हारपछि चीन प्रतियोगिताबाट बाहिरिएको छ। समूह ‘बी’ मा ओमान, हङकङ, बहराइन र सिङ्गापुर रहेका छन्, जहाँ शीर्ष दुई टोलीले एसियन गेम्समा स्थान बनाउने प्रावधान छ।
