काठमाडौं । खाद्य प्रविधि तथा गुण नियन्त्रण विभागले बैशाख ३० गते कागेश्वरी मनोहरा नगरपालिका क्षेत्रका विभिन्न खाद्य तथा पानी उद्योगहरूमा अनुगमन निरीक्षण गरी खाद्य स्वच्छता तथा गुणस्तर ऐन, २०८१ बमोजिम कारबाही गरेको छ।
अनुगमनका क्रममा कुल ४ वटा खाद्य व्यवसायमा निरीक्षण गरिएको विभागले जनाएको छ। निरीक्षणका क्रममा विभिन्न उद्योगहरूमा सरसफाइको कमी, मापदण्ड विपरीत सञ्चालन, पुराना तथा कुच्चिएका जारहरूको प्रयोग, संरचनागत कमजोरी तथा अनुमति पत्र नवीकरण नगरेको जस्ता कैफियतहरू भेटिएका थिए।
भद्रकाली पानी उद्योगमा ४१ वटा पुराना तथा कुच्चिएका जार फेला परेका थिए, जसलाई नष्ट गरिएको छ। साथै, उद्योग परिसर वर्षायाममा पानी जम्ने खालको रहेको, जार भर्ने कक्ष बाहिर टायल फुटेको र मर्मत आवश्यक रहेको पाइएको छ। पानीको नमुना प्रयोगशाला परीक्षणका लागि संकलन गरिएको विभागले जनाएको छ।
त्यस्तै, सिद्धकाली अक्वा पानी उद्योगमा १६ वटा कुच्चिएका जार फेला परेका थिए, जसलाई नष्ट गरिएको छ।
मनोहरा फुड एण्ड वेभरेज प्रा.लि.मा UV लाइट पानी भर्ने स्थानको ठीक अगाडि नराखिएको, एउटै कक्षमा जार पखाल्ने र भर्ने कार्य भइरहेको तथा सरसफाइको अवस्था सामान्य रहेको पाइएको छ। त्यहाँ १९ वटा पुराना तथा कुच्चिएका जार नष्ट गरिएको छ भने कक्ष व्यवस्थापन सुधार गर्न निर्देशन दिइएको छ। सो उद्योगबाट पनि पानीको नमुना संकलन गरिएको छ।
ओसियन ड्रिडिङ वाटर इण्डष्ट्रिजमा भने खाद्य अनुमतिपत्र नवीकरण नगरेको, जारहरू फुटेको तथा प्वाल परेको अवस्थामा रहेको, पाइपलाइन बिग्रिएको र अन्य उद्योगका जार प्रयोग भएको पाइएको छ। सो उद्योगबाट ७३ वटा जार नष्ट गरिएको छ र देखिएका कैफियत सुधार गरी ७ दिनभित्र विभागमा उपस्थित हुन निर्देशन दिइएको छ। यस उद्योगबाट पनि पानीको नमुना परीक्षणका लागि संकलन गरिएको छ।
विभागले अनुगमनका क्रममा देखिएका सबै कैफियत सुधार गर्न निर्देशन दिँदै खाद्य स्वच्छता तथा गुणस्तर सुनिश्चित गर्न आवश्यक कानुनी प्रक्रिया अघि बढाइएको जनाएको छ।
