काठमाडाैँ । काठमाडौं महानगरपालिकाले गोरखा मिडिया नेटवर्क प्रालिका नाममा १५ दिने सार्वजनिक सूचना जारी गर्दै ग्यालेक्सी टेलिभिजनमा रहेका सामान सम्बन्धित पक्षले समयमै नलगिए लिलाम प्रक्रियामा जाने जनाएको छ।
महानगरपालिकाको कानून तथा मानव अधिकार विभागले सोमबार सूचना जारी गर्दै काठमाडौं महानगरपालिका वडा नं. ३ निवासी मृगेन्द्र प्रसाद मिश्रले दायर गरेको घरभाडा असुल तथा घरजग्गा खाली गराउने मुद्दामा यसअघि न्यायिक समितिबाट भएको निर्णय कार्यान्वयन भइसकेको जनाएको हो।
सूचनाअनुसार काठमाडौं महानगरपालिका न्यायिक समितिले २०८१ कात्तिक १४ गते प्रतिवादी गोरखा मिडिया नेटवर्कका अध्यक्ष गितेन्द्र बाबु राईबाट बहाल रकम र बहाल कर असुल गरी घरजग्गा खाली गराउने निर्णय गरेको थियो। उक्त निर्णय कार्यान्वयन गर्न २०८२ साउन २८ गते उच्च अदालत पाटनले दुई महिनाभित्र कार्यान्वयन गर्न परमादेश जारी गरेको थियो।
अदालतको आदेशअनुसार महानगरपालिकाले २०८२ कात्तिक १४ गते डोर खटाई निर्णय कार्यान्वयन गरिसकेको जनाएको छ।
निर्णय कार्यान्वयन भएको ६ महिना पूरा भएपछि वादी मृगेन्द्र मिश्रले ग्यालेक्सी टेलिभिजनमा रहेका सामान लिलाम गरिपाऊँ भनी २०८३ वैशाख २१ गते निवेदन दिएका थिए। सोही आधारमा महानगरले अन्तिम सूचना जारी गरेको जनाएको छ।
महानगरले सूचना प्रकाशन भएको मितिले १५ दिनभित्र घरधनीलाई बुझाउनुपर्ने बाँकी बहाल रकम बुझाई आफ्नो सामान लगेका खण्डमा थप कारबाही नहुने जनाएको छ। अन्यथा निर्धारित समयभित्र सामान नलगिए काठमाडौं महानगरपालिका विवाद निरुपण (कार्यविधि) ऐन, २०७५ को दफा ७० बमोजिम सामान लिलाम प्रक्रिया अघि बढाइने उल्लेख गरिएको छ।
