काठमाडौं। इन्डियन प्रिमियर लिग (आइपिएल) खेलमा राजस्थान रोयल्सले शानदार जित हात पारेको छ ।
आइतबार साँझ सम्पन्न खेलमा राजस्थानले मुम्मबइ इन्डियन्सलाई ३० रनले पराजित गर्दै प्लेअफमा स्थान पक्का गरेको हो। राजस्थानले प्लेअफमा स्थान बनाएसँगै पञ्जाब किंग्स भने प्रतियोगिताबाट बाहिरिएको छ। यो सँगै प्लेअफ पुग्ने सबै चार टिमको तय भएको छ।
रोयल च्यालेन्जर्स बेङ्गलुरु, गुजरात टाइटन्स, सनराइजर्स हैदराबाद र राजस्थानले प्लेअफमा स्थान बनाएका हुन् । अब मे २६ मा हुने क्वालिफायर–१ मा बेङ्गलुरु र गुजरात भिड्नेछन् भने मे २७ मा हुने इलिमिनेटरमा हैदराबाद र राजस्थान आमनेसामने हुनेछन् ।
आइतबार दिउँसो भएको २ सय ६ रनको लक्ष्य पछ्याएको मुम्बईको सुरुआत निकै खराब रह्यो। रोहित शर्मा शून्यमै आउट भए भने पावरप्लेभित्रै टोलीले ४ विकेट गुमायो। त्यसपछि सूर्यकुमार यादवले ६० रन र हार्दिक पाण्ड्याले ३४ रन बनाएर टोलीलाई खेलमा फर्काउने प्रयास गरे पनि लगातार विकेट गुम्दा मुम्बई लक्ष्यसम्म पुग्न सकेन ।
राजस्थानका लागि जोफ्रा आर्चरले सर्वाधिक ३ विकेट लिए। नान्द्रे बर्गर, ब्रिजेश शर्मा र यश पुंजाले समान २–२ विकेट लिए।
ब्याटिङतर्फ ध्रुव जुरेलले ३८ रन बनाए भने आर्चरले १५ बलमा ३२ रनको आक्रामक इनिङ्स खेले। दासुन शनाकाले २९ रन जोडे। अन्तिम समयमा रविन्द्र जडेजा र बर्गरले तीव्र गतिमा रन थप्दै राजस्थानलाई २ सय रन पार गराएका थिए।
मुम्बईका लागि दीपक चाहर र शार्दुल ठाकुरले समान २ विकेट लिए। विल ज्याक्स, अल्लाह गजनफर र कर्बिन बोशले १–१ विकेट हात पारे।
