काठमाडौं । पाेखरा महानगरपालिकाले फिर्केखोला अतिक्रमण गरी निर्माण गरिएका अवैध संरचना हटाउन आइतबार बिहानदेखि डोजर परिचालन गरेको छ ।
फेवातालको प्रमुख मुहानका रूपमा रहेको फिर्केखोलाको संरक्षण तथा सीमांकनसम्बन्धी सर्वोच्च अदालतको आदेश कार्यान्वयन गर्ने क्रममा महानगरपालिकाले अतिक्रमण हटाउने अभियान अघि बढाएको हो ।
महानगरपालिकाले २०८० साउनमा फिर्केखोलाको वास्तविक मापदण्ड निर्धारण गर्न प्राविधिक नापजाँच गरेको थियो । अध्ययनका क्रममा करिब ८ किलोमिटर लामो खोलाको बहाव क्षेत्र र मापदण्डभित्र १६० भन्दा बढी अवैध संरचना निर्माण भएको तथ्य फेला परेको थियो ।
महानगरको प्रतिवेदनअनुसार तीमध्ये ९७ वटा व्यक्तिगत अस्थायी घर रहेका छन् भने अन्य स्थायी संरचना हुन् । अतिक्रमित संरचनामा केही विद्यालय, विभिन्न टोल तथा जातीय संगठनका समाजघर, लायन्स क्लब अफ फिस्टेल सिटीको भवन तथा वडा नम्बर १७ को गाईघाटस्थित सशस्त्र प्रहरी बल (एपीएफ) को तालिम केन्द्रको भवन समेत परेका छन् ।
यसअघि महानगरपालिकाले गत वैशाख ४ गते सार्वजनिक सूचना जारी गर्दै मापदण्डभित्र बनेका संरचना स्वेच्छाले हटाउन आग्रह गरेको थियो । तर, सूचनाको पालना नभएपछि आइतबार बिहानदेखि फिर्केखोलाका तीन विभिन्न स्थानबाट डोजर परिचालन गरी संरचना भत्काउने कार्य सुरु गरिएको महानगरपालिकाले जनाएको छ ।
