काठमाडौं: नारायणी मेमोरियल फाउन्डेसनले तेह्रथुम जिल्लाका १० वटा विद्यालयका २५ जना विद्यार्थीलाई छात्रवृत्ति वितरण गरेको छ ।
यो छात्रवृत्ति शैक्षिक सत्र २०८३ को लागि वितरण गरिएको हो । तेह्रथुमको आठराई गाउँपालिका वडा नम्बर ५ छातेढुङ्गाको सभाकक्षमा आयोजित समारोहमा उक्त छात्रवृत्ति वितरण गरिएको हो ।
पूर्वज एवं प्रियजनको स्मृति र सम्मानमा मौनधारण गरि सुरु भएको कार्यक्रममा फाउन्डेसनको स्वागत गीतबाट सहभागीहरुलाई स्वागत गरिएको थियो।
फाउन्डेसनका सचिव प्रदीप पाठकले संस्थाको उद्देश्य, गतिविधि र भावी कार्यक्रमबारे प्रकाश पार्दै संस्थाले झापा, मोरङ, तेह्रथुम र ताप्लेजुङ जिल्लाका १०० भन्दा बढी विद्यार्थी छात्रावृत्तिबाट लाभान्वित भएको जानकारी गराउनुभएको थियो ।
फाउन्डेसनका अध्यक्ष वरिष्ठ अधिवक्ता नरेन्द्र प्रसाद पाठकको अध्यक्षतामा सञ्चालित कार्यक्रममा प्रदेश सभाका पूर्व सांसद तेजमान कन्दङवा, आठराई गाउँपालिकाका ५ नम्बर वडा अध्यक्ष विष्णु प्रसाद ओली, ४ नम्बर वडा अध्यक्ष खगेन्द्र गुरुङ र प्रधानाध्यापहरुको तर्फबाट शारदा माध्यमिक विद्यालयका प्रधानाध्यापक प्रेम प्रकाश लामिछानेले फाउन्डेसनको सफलताको शुभकामना व्यक्त गर्नु भएको थियो ।
उहाँहरुले फाउन्डेसनले तेह्रथुम जिल्लाका २५ जेहन्दार, गरीब, असक्त, अनाथ छात्रछात्राले शिक्षा आर्जन गर्ने अवसर दिएकोमा संस्थाको उन्नति प्रगतिको कामना गर्नुभयो ।
छात्रवृत्ति रकमसहित झोला, स्टेसनरी समेत वितरण गरिएको कार्यक्रमको सञ्चालन नारायणी मेमोरियल फाउन्डेसन छात्रवृत्ति समिति तेह्रथुमका सदस्य नवराज ओलीले गर्नुभएको थियो ।
