काठमाडौँ । नेकपा एमालेले व्यवसायी मीनबहादुर गुरुङले अनुदानस्वरूप निर्माण गरी दिने प्रस्ताव गरेको पार्टी कार्यालय भवन नलिने निर्णय गरेको छ । गुरुङ दम्पतीले कलङ्की क्षेत्रमा जग्गासहित भवन निर्माण गरिदिने प्रस्ताव अघि सारे पनि पार्टीले त्यसलाई औपचारिक रूपमा स्वीकार नगर्ने भएको हो ।
पार्टी अध्यक्ष केपी शर्मा ओलीले सचिवालय बैठकमा प्रस्तुत गरेको प्रस्तावअनुसार उक्त दान प्रस्तावप्रति आभार व्यक्त गर्दै फिर्ता गर्ने र अब पार्टी कार्यालय आफ्नै पहलमा मदननगर, बल्खुमै निर्माण गर्ने निर्णय गरिएको छ ।
प्रस्तावमा भनिएको छ, “कलङ्कीमा भवन निर्माण गर्ने दातृ प्रस्तावका लागि धन्यवाद दिँदै उक्त प्रस्ताव फिर्ता गर्ने र पार्टी कार्यालय बल्खुमै निर्माण गर्ने निर्णय गरिनेछ।”
यसअघि दानमा पार्टी कार्यालय लिन लागिएको विषयलाई लिएर पार्टीभित्रै केही नेताहरूले असन्तुष्टि जनाएका थिए । उक्त विवादकै क्रममा नेतृ बिन्दा पाण्डे र उषाकिरण तिम्सिनामाथि कारबाहीसमेत गरिएको थियो ।
