स्रोतका अनुसार केही घण्टाअघि मात्र ककरोच जनता पार्टीको इन्स्टाग्राम फलोअर्स संख्या १० मिलियन नाघेको थियो भने भाजपाको आधिकारिक अकाउन्टमा करिब ८.७ मिलियन फलोअर्स रहेका छन्। यही समयमै एक्स अकाउन्ट भारतमा पहुँचयोग्य नभएको देखिएपछि विषयले सामाजिक सञ्जालमा व्यापक चर्चा पाएको छ।
पार्टीका संस्थापक अभिषेक दीपकेले अकाउन्ट ‘विथहेल्ड’ भएको दाबी गर्दै स्क्रिनसट सार्वजनिक गरेका छन्। उनले प्रतिक्रिया दिँदै लेखेका छन्, “अपेक्षा गरेअनुसार नै ककरोच जनता पार्टीको अकाउन्ट भारतमा विथहेल्ड गरिएको छ।”
व्यङ्ग्यात्मक शैलीमा सुरु भएको यो डिजिटल अभियान पछिल्ला दिनमा विशेषगरी युवापुस्तामाझ तीव्र रूपमा फैलिँदै आएको छ। बेरोजगारी, परीक्षा प्रणालीप्रतिको असन्तुष्टि, प्रश्नपत्र चुहावट र राजनीतिक जवाफदेहिताजस्ता मुद्दालाई केन्द्रमा राख्दै बनेको यो समूह अहिले सामाजिक सञ्जालमा एक प्रकारको ‘मीम-आधारित राजनीतिक आन्दोलन’का रूपमा स्थापित हुँदै गएको देखिन्छ।
अकाउन्टमाथिको प्रतिबन्धपछि यस घटनाले अभिव्यक्ति स्वतन्त्रता, डिजिटल राजनीतिक सक्रियता र सामाजिक सञ्जालमा बढ्दो व्यङ्ग्यात्मक आन्दोलनबारे नयाँ बहस सुरु गरेको छ।
