काठमाडाैँ । सहकारी विभागले राष्ट्रिय सहकारी बैंक लगायतका सहकारी संघसंस्थाहरूको सञ्जालक समितिको निर्वाचनमा दलीय आधारमा प्यानल बनाएर प्रतिस्पर्धा गर्ने अभ्यासप्रति गम्भीर ध्यानाकर्षण भएको जनाएको छ।
विभिन्न सञ्चारमाध्यममा प्रकाशित समाचारहरूमा सहकारी निर्वाचनमा राजनीतिक दलहरूको आस्थाका आधारमा प्यानल खडा गरी प्रतिस्पर्धा भइरहेको उल्लेख भएपछि विभागले आपत्ति जनाएको हो। विभागका अनुसार सहकारीका आधारभूत मूल्य, मान्यता र सिद्धान्तविपरीत यस्ता गतिविधिले सहकारी ऐन, २०७४ को प्रस्तावना तथा कानूनी व्यवस्थामाथि प्रतिकूल असर पार्ने देखिएको छ।
विज्ञप्तिमा यस्ता अभ्यासका कारण सहकारीका सदस्यहरूबीच अस्वस्थ प्रतिस्पर्धा बढ्ने र सहकारी क्षेत्रमा सुशासन कायम गर्न चुनौती थपिने उल्लेख गरिएको छ। सहकारीको मूल मर्मअनुसार सञ्चालन हुनुपर्ने वातावरण निर्माण गर्न सबै सरोकारवालालाई सहयोग गर्न पनि विभागले अनुरोध गरेको छ।
विभागले सहकारी क्षेत्रमा सुशासन कायम गर्न यस्ता गतिविधिहरूलाई निरुत्साहित गर्नुपर्ने आवश्यकता औंल्याउँदै सहकारीको मूल उद्देश्यअनुसार नै संस्थाहरू सञ्चालन हुनुपर्नेमा जोड दिएको छ।
सहकारी प्रणालीलाई राजनीतिक प्रभावबाट टाढा राख्दै स्वच्छ, पारदर्शी र मूल्य–आधारित रूपमा अघि बढाउन आग्रह गरिएको छ
