काठमाडौँ: सर्वोच्च अदालतका न्यायाधीश डा.मनोजकुमार शर्मा हिजो नेपालको प्रधानन्यायाधीशमा नियुक्त भएका छन् । उनी प्रधानन्यायाधीश नियुक्त भइरहँदा कम्तीमा दुई ओटा रेकर्ड नै ब्रेक गरेका छन् ।
पहिलो उनी यसरी एकैदिन संसदीय समितिबाट अनुमोदित, एकै दिन नियुक्ति र उही दिन सपथ लिएर हिजो नै पदबहाली गरेका छन् । त्यसो त एकै दिन संसदीय सुनुवाईका लागि परेका करिब डेढ दर्जन उजुरी पनि एकै दिन नै सफाया गरिएको थियो ।
वर्तमान संविधान जारी भएपछि प्रधानन्यायाधीश नियुक्ति प्रक्रिया सम्भवत यसअघि यति चाँडै र यसरी नियुक्ति भएको थिएन । आजका मिडिया सबैमा यो खबर प्राथमिकतामा पनि छ ।
अनि अर्को रेकर्ड चाहिँ उनी चौथो नम्बरको सिफारिसका न्यायाधीश प्रधानन्यायाधीशमा नियुक्त भए । न्यायपरिषदको सिफारिसमा उनी चौथो नम्बरमा थिए तर संवैधानिक परिषदले उनलाई नै सिफारिस गर्यो । यसअघि पहिलो नम्बरकै वरिष्ठ न्यायाधीश नै सिफारिस हुने प्रचलन रही आएको थियो ।
तर, यसरी नियुक्त भएका प्रधानन्यायाधीशको काँधमा जिम्मेवारी पनि त्यस्तै गम्भीर र विशेष प्रकृतिको नै छ । त्यो जिम्मेवारी यसअघिका प्रधानन्यायाधीशमा थिएन । जस्तो यतिखेर मुलुकको विशेष परिस्थिति छ, युवा र जेनजी समूहको बाहुल्यताको सरकार छ ।
यो सरकारको पृष्ठभूमि चाहिँ जेनजी आन्दोलन हो । गत भदौको जेनजी आन्दोलनमा भएको आगजनी र क्षतिको अवस्था त सबैलाई ज्ञात नै छ । त्यो पृष्ठभूमिले न्यायालय पनि घायल भएको थियो । यतिसम्म कि मुलुकको प्रमुख र उच्च न्यायालय सर्वोच्च अदालत नै जलेको थियो ।
सर्वोच्चको भवन मात्र जलेन, मुलुकको न्याय क्षेत्रको मन मस्तिष्क नै नराम्ररी जलेको थियो । अदालत जलाउन गएकाहरुको भिडियो अझै पनि पाइन्छ, उनीहरुले न्याय प्रशासनलाई जनताको दुस्मन देखेका थिए ।
त्यसैले त्यो जलेको न्यायालय मात्र नभएर न्याय हो भन्दा फरक पर्दैन । यही नै नवनियुक्त प्रधानन्यायाधीशको सबैभन्दा ठूलो चुनौती र जिम्मेवारी हो । यो जिम्मेबारी अब डा मनोज शर्माको काँधमा आएको छ ।
हिजो उनी बडो रफ्तारमा प्रधानन्यायाधीश नियुक्त र बहाल भइरहँदा यता मुलुकको बारले दिउँसै लालटिन बालेको थियो । त्यो लालटिन पनि कुनै न कुनै रुपमा उनकै नियुक्तिसँग पनि जोडिएको छ ।
त्यसैले यी चुनौतीहरुलाई अब आउने दिनमा चिरेर प्रधानन्यायाधीशले मुलुकमा न्याय जगाउने काममा लाग्नुपर्ने पहिलो दायित्व देखिएको छ ।
फोटो- रासस
