काठमाडाैँ । पोखरा महानगरपालिकाले न्युरोड क्षेत्रका फुटपाथ (सडकपेटी) मा हुने अनधिकृत पार्किङ हटाउने अभियानलाई तिब्रता दिएको छ ।महानगरको वडा नम्बर ८ र ९ अन्तर्गत पर्ने न्यूरोड क्षेत्रमा पैदलयात्रीको सहजताका लागि सडकपेटी खाली गराउन थालिएको हो ।
नगर प्रहरी निरीक्षक पुरुषोत्तम थापाकाअनुसार फुटपाथ पैदलयात्रीका लागि मात्र भएकाले त्यहाँ सवारी साधन पार्किङ गर्दा आवागमनमा अवरोध पुग्ने र दुर्घटनाको जोखिम बढ्ने हुँदा यो कदम चालिएको हो ।
उहाँले महानगरपालिकाले तोकेका निश्चित स्थानहरूमा मात्र पार्किङ गर्न र अन्य क्षेत्रमा सवारी धनी स्वयंले व्यवस्थापन गर्नुपर्ने स्पष्ट पार्नुभयो । महानगरले यो अभियान शुरु गर्नुअघि गत शुक्रवारदेखि आईतवारसम्म तीन दिन लगातार माइकिङ गरी नगरबासीलाई यसबारे जानकारी गराएको थियो । सूचनाको अवज्ञा गर्ने सवारी साधनमाथि आजदेखि कारबाही शुरु गरिएको छ । सोमवार मात्रै फुटपाथमा पार्किङ गरिएका ८ वटा मोटरसाइकल नियन्त्रणमा लिइएको नगर प्रहरीले जनाएको छ ।
उहाँले भन्नुभयो, ‘फुटपाथ बाइक राख्ने ठाउँ होइन, यो पैदलयात्रीका लागि बनाइएको हो । महानगरले न्यूरोडका केही स्थानमा पार्किङको व्यवस्था गरेको छ, त्यहीँ पार्किङ गर्नुपर्छ । दीर्घकालीन पार्किङको व्यवस्था नभएसम्म फुटपाथलाई भने पूर्ण रूपमा खाली राखिनेछ ।’
नगर प्रहरी निरीक्षक थापाले मंगलवारदेखि थप कडाइ गरिने बताउनु भयो । अबका दिनमा फुटपाथमा पार्किङ गरिएको पाइएमा सवारी धनीलाई तत्काल सवारी साधन नबुझाइने र ती साधन नियन्त्रणमा लिएर जिल्ला ट्राफिक प्रहरी कार्यालय पठाई नियमानुसार कडा कारबाही गरिने उहाँको भनाइ छ । महानगरले सडकपेटी खाली गराई सडकमा हुने चाप र सम्भावित दुर्घटना न्युनिकरणमा सहयोग पु¥याउन सम्पूर्ण सवारी धनी तथा नगरबासीलाई आग्रह गरेको छ ।
