काठमाडाैँ । नेपाली कम्युनिष्ट पार्टीका सांसद सुरेश आलेमगरले संसदमा राष्ट्रपतिमाथी प्रधानमन्त्रीले गरेको अपमानलाई सहन नसकिने बताउनुभएको छ ।
बुधवार बसेको राष्ट्रिय सभाको बैठकमा बोल्दै उहाँले राष्ट्रपति रामचन्द्र पौडेलले सरकारको नीति तथा कार्यक्रम वाचन गर्ने क्रममा प्रधानमन्त्रीको अनुपस्थिति राष्ट्रपति माथीको अपमान भएको बताउनुभएको हो ।
यहाँले यसविषयमा प्रधानमन्त्री बालेन्द्र साहले संसदमा जानकारी गराउनुपर्ने बताउनुभयो । राष्ट्रपतिले संसदमा सरकारको नीति तथा कार्यक्रम वाचन गरिरहँदा प्रधानमन्त्री उपस्थित नहुनु सामान्य घटना मात्रै नभएको उहाँको भनाई छ । उहाँले स्वास्थ्यकै कारण हो भने राष्ट्रपतिले सम्बोधन गरिरहँदा मात्रै बिग्रिने कुन खालको स्वास्थ्य हो भन्दै प्रश्न गर्नुभयो ।
सांसद आलेमगरले प्रधानमन्त्री स्वयं सदनमा उपस्थित भएर घटनाको वास्तविक कारण स्पष्ट पार्नुपर्ने माग समेत गर्नुभयो ।नेकपा एमालेले राष्ट्रिय सभाकी सचेतक रोशनी मेचेले पनि संसदमा उपस्थित भएर प्रधानमन्त्रीले उक्त घटनाको बारेमा जानकारी दिनुपर्ने बताउनु भयो । संसदमा अर्मादीय र असंवैधानिक व्यवहार कसैले गर्न नहुनेतर्फ उहाँले ध्यानकर्षण गराउनु भयो । प्रधानमन्त्रीको क्रियाकलापले लज्जाबोध भएको उहाँको भनाई छ ।
