काठमाडाैँ । प्रतिनिधि सभामा राष्ट्रिय स्वतन्त्र पार्टी (रास्वपा) की सांसद लिमा अधिकारीले नेपालले विश्वलाई आकर्षित गर्ने नयाँ आर्थिक मोडेल निर्माण गर्नुपर्ने धारणा राख्नुभएको छ। उहाँले सगरमाथाको शीतलता र देशको शान्तिलाई नै अर्थतन्त्रको बलियो आधारका रूपमा विकास गर्नुपर्ने प्रस्ताव गर्नुभएकाे छ ।
बुधवार प्रतिनिधि सभा बैठकको शून्य समयमा बोल्दै सांसद अधिकारीले नेपाल लामो समयदेखि रेमिट्यान्समा निर्भर रहँदै आएको उल्लेख गर्दै अब त्यसबाट बाहिर निस्केर नयाँ सोचका साथ अघि बढ्नुपर्ने आवश्यकता औंल्याउनुभयो। उहाँले प्रविधिको युगमा विश्वभरका दक्ष जनशक्तिलाई नेपालमा आकर्षित गर्न सकिने सम्भावनालाई उपयोग गर्न सरकारलाई आग्रह गर्नुभयो।
उहाँका अनुसार नेपालको भौगोलिक विविधता, सांस्कृतिक समृद्धि, हिमालदेखि तराईसम्मको जीवनशैली र परम्पराले विश्वका प्राविधिक तथा सिर्जनशील व्यक्तिहरूलाई आकर्षित गर्न सक्ने क्षमता राख्छ। यसलाई आधार बनाएर नेपाललाई “वर्क फ्रम नेपाल” को गन्तव्यका रूपमा विकास गर्न सकिने उहाँको भनाइ थियो।
सांसद अधिकारीले डिजिटल प्रविधिको विस्तारसँगै विश्वका विज्ञहरूलाई नेपालमा बसेर काम गर्न सक्ने वातावरण बनाउन उपयुक्त भिसा नीति आवश्यक रहेको सुझाव पनि दिनुभयो। उहाँले यस्तो नीतिले नेपालमा ज्ञान, प्रविधि र लगानी भित्र्याउन मद्दत पुग्ने विश्वास व्यक्त गर्नुभयो।
यसैगरी, नेपालले आफ्नो शान्त वातावरण र प्राकृतिक सौन्दर्यलाई आर्थिक अवसरमा रूपान्तरण गर्न सके दिगो विकास सम्भव हुने उहाँको तर्क थियो।
