काठमाडौं । नेपाली कांग्रेसका सभापति गगन कुमार थापाले माध्यमिक शिक्षा परीक्षा (एसईई) मा सफल भएका विद्यार्थीहरूलाई बधाई दिँदै अपेक्षित नतिजा प्राप्त गर्न नसकेकाहरूलाई निराश नहुन आग्रह गरेका छन्।
सामाजिक सञ्जालमार्फत प्रतिक्रिया दिँदै उनले एसईईमा उत्तीर्ण भएका सम्पूर्ण विद्यार्थीहरूको मेहनत र लगनशीलता सफलतामा परिणत भएको उल्लेख गरेका छन्। उनले सफल विद्यार्थीहरूलाई हार्दिक बधाई दिँदै आगामी शैक्षिक यात्राका लागि शुभकामना व्यक्त गरेका छन्।
त्यस्तै, अपेक्षाअनुसार ग्रेड हासिल गर्न नसकेका विद्यार्थीहरूलाई नतिजालाई जीवनको अन्तिम निष्कर्षका रूपमा नलिन आग्रह गर्दै उनले यसलाई केवल एउटा खुड्किलोको रूपमा लिनुपर्ने बताएका छन्। उनले आगामी ग्रेड वृद्धि परीक्षा आफ्ना क्षमता प्रमाणित गर्ने अर्को महत्वपूर्ण अवसर भएको उल्लेख गरेका छन्।
थापाले विद्यार्थीहरूको मनोबल उच्च राख्न तथा आवश्यक शैक्षिक परामर्श उपलब्ध गराउन स्थानीय सरकारहरूलाई तत्काल समन्वय गर्न आग्रह गरेका छन्।
यसैबीच, यस वर्ष एसईईको नतिजा अपेक्षाकृत छिटो सार्वजनिक भएको भन्दै उनले नेपाल सरकार, सम्बन्धित निकाय तथा परीक्षासँग जोडिएका सबै पक्षलाई धन्यवाद तथा बधाईसमेत दिएका छन्।
