काठमाडाैँ । आर्थिक वर्ष २०८३/८४ को पूर्ण बजेटकालीन समीक्षा प्रतिवेदन अर्थमन्त्री डा. स्वर्णिम वाग्लेसमक्ष प्रस्तुत गरिएको छ । सोमबार नेपाल राष्ट्र बैंकका गभर्नर डा. विश्व पौडेलले उक्त प्रतिवेदन अर्थमन्त्रीसमक्ष बुझाउनुभएको हो ।
नेपाल राष्ट्र बैंक ऐन, २०५८ को दफा ५ मा आर्थिक तथा वित्तीय अवस्था सम्बन्धी प्रतिवेदन तयार गर्ने व्यवस्था रहेको छ । त्यसैगरी दफा ६९ को उपदफा (४) अनुसार आगामी आर्थिक वर्षको बजेट तर्जुमा गर्न सहयोग पुर्याउने उद्देश्यले मुलुकको समग्र आर्थिक तथा वित्तीय अवस्थाबारे नेपाल सरकारसमक्ष राष्ट्र बैंकले प्रतिवेदन पेश गर्नुपर्ने कानुनी व्यवस्था रहेको छ ।
उक्त व्यवस्था अनुरूप राष्ट्र बैंकले तयार गरेको समीक्षा प्रतिवेदनमा देशको समष्टिगत आर्थिक अवस्था, वित्तीय क्षेत्रको अवस्था, मौद्रिक नीतिको प्रभाव तथा आगामी आर्थिक वर्षका लागि आवश्यक नीति सुझावहरू समेटिएको जनाइएको छ । अर्थ मन्त्रालयले उक्त प्रतिवेदनलाई आगामी बजेट तयारीमा महत्वपूर्ण आधारका रूपमा प्रयोग गर्ने अपेक्षा गरिएको छ ।
प्रतिवेदन बुझाउने कार्यक्रममा आर्थिक सूचकहरूमा देखिएका प्रवृत्ति, चुनौती तथा सुधारका सम्भावित क्षेत्रबारे समेत प्रारम्भिक छलफल भएको बताइएको छ ।
