सिन्धुपाल्चोक। भोटेकोसी गाउँपालिकाका अध्यक्ष राजकुमार पौडेलले पालिकाको बजेटमा आफूखुसी गरेको वडाध्यक्षहरूले आरोप लगाएका छन् । गाउँपालिकाका पाँच वडामध्ये चार वडाका अध्यक्षले आफूहरू फरक पार्टीबाट चुनाव जितेको भन्दै अध्यक्षले बजेटै नदिने गरेको आरोप लगाएका हुन् । गाउँपालिका अध्यक्षले आफूहरूलाई व्यापक पेलेर अघि बढेकाले अब आफूहरु चुप लागेर नबस्ने वडाध्यक्षहरूको चेतावनी छ ।
‘हामी जनतालाई गाउँमा नै सुविधा दिन खोजिरहेका छौं तर अध्यक्षले त्यसमा अवरोध सिर्जना गर्नुभयो,’ भोटेकोसी गाउँपालिका–१ का अध्यक्ष मुके शेर्पाले भने । भोटेकोसी गाउँपालिका–२ को वडा भवन शिलान्यास कार्यक्रममा गाउँपालिका अध्यक्षले पालिका कब्जा गरेको र आफू हुँदो मात्रै विकास बजेट बाँडफाँट गर्ने गरेको आरोप वडाध्यक्षहरूले लगाएका छन् ।
स्थानीय तहको निर्वाचनको समयमा पालिकाबाट केही सुविधा लिन्न भनेको र पछि गाउँपालिकाको बैठकमा समेत सेवा सुविधा लिन्न भनेर माइन्युट नै गरे पनि अहिले भने करोडौंको सुविधा लिएको प्रति चारै वडाका वडाध्यक्षले सार्वजनिक रूपमा नै गाउँपालिका अध्यक्ष पौडेलेको विरोध गरेका छन् । ‘आफ्नो तलब भत्ताबाट स्कुलका विद्यार्थीलाई स्टेसनरी र झोला वितरण गरेको भनेर अध्यक्षले प्रचार गरिरहेका छन् तर त्यो सबै गाउँपालिकाको बजेट बाट वितरण गरिएको हो,’ वडाध्यक्ष शेर्पाले भने ।
गाउँपालिकामा कार्यरत शिक्षकले अध्यक्षकै कारण विगत ६ महिनादेखि तलब सुविधा नै नपाएको वडाध्यक्षहरूले बताएका छन् । राजनीतिक आस्था हेरेर शिक्षकलाई सरुवा बढुवा गर्दा
गाउँपालिकाभित्रका सयौं बालबालिकाको भविष्यमाथि खेलबाड गरेको वडाध्यक्ष शेर्पाले आरोप लगाए । भूकम्पले वडा कार्यालय क्षतिग्रस्त भएपछि निर्माणका लागि गाउँपालिकामा अनुरोध गर्दा पनि गाउँपालिका अध्यक्ष राजकुमार पौडेलले अटेर गरेको भोटेकोसी गाउँपालिका–२ का वडाध्यक्ष दीपेन्द्र श्रेष्ठले गुनासो गरे ।
‘अस्थाई टहरोमा बसेर जनतालाई सेवा दिन सकिएन, वडा कार्यालय निर्माण गरौं,’ भनेर धेरै अनुरोध गरे तर अध्यक्षले सधैं अवरोध मात्रै सिर्जना गर्नुभयो,’ वडाध्यक्ष दीपेन्द्र श्रेष्ठले भने । भवन निर्माणमा सहयोग गर्ने घोषणा गर्न आएका भोटेकोसी पावर कम्पनीका प्रतिनिधिलाई नेकपाका नेताले बीच बाटोबाटै फर्काइदिएको वडाध्यक्ष श्रेष्ठले आरोप लगाए । भवन शिलान्यास कार्यक्रमलाई असफल बनाउन कसैलाई पनि कार्यक्रममा नजानका लागि उर्दी जारी गरे पनि आफूहरूले भवन शिलान्यास गर्न सफल भएको वडाध्यक्ष श्रेष्ठले बताए ।
नेकपाबाट जितेकाले कांग्रेसलाई बनाए प्रमुख अतिथि: भोटेकोसी गाउँपालिकामा अध्यक्ष, उपाध्यक्षसहित दुई वडामा नेकपाले चुनाव जितेको थियो । भोटेकोसी–२ का वडाध्यक्ष तत्कालीन नेकपा माओवादीबाट चुनाव जिते पनि भवन शिलान्यास कार्यक्रममा भने कांग्रेस केन्द्रीय सदस्य मोहनबहादुर बस्नेतलाई सहभागी गराएर भवन शिलान्यास गराएका छन् ।
भवन शिलान्यास कार्यक्रममा नेकपाकाको नेता मात्रै होइन स्थानीय कार्यकर्तासमेत सहभागी भएनन् । उद्घोषकले गाउँपालिका अध्यक्ष राजकुमार पौडेललाई विशेष अतिथिको आशन ग्रहणका लागि बोलाए पनि अध्यक्ष पौडेल कार्यक्रममा सहभागी भएनन् । राजधानी दैनिकबाट
