काठमाडौं । राष्ट्रिय सतर्कता केन्द्रले स्वास्थ्य सम्बन्धित १ सय ६७ उजुरी परेको जनाएको छ । पछिल्लो तीन वर्षयता विभिन्न प्रकृतिका १ सय ६७ नयाँ उजुरी दर्ता भएका हुन् । सबैभन्दा बढी उपकरण खरिद र अनियमितता सम्बन्धित छन् । २०७४/७५ मा ६६, २०७५/७६ मा ७५ र २०७६ कात्तिक मसान्तसम्म २५ वटा नयाँ उजुरी दर्ता भएको केन्द्रले जनाएको छ । पछिल्लो तीन वर्षमा १ सय ७७ उजुरी फछ्र्योट भएका छन् ।
जसअन्तर्गत वीर अस्पतालमा बिरामीलाई खुवाउने खाना र बीपी कोइराला स्वास्थ्य विज्ञान प्रतिष्ठान भवन निर्माणमा अनियमिततालगायत छन् । काठमाडौं बाहेक अन्य जिल्लामा उपकरण खरिद क्रममा लागत अनुमान तयार गर्दा ‘ओभरहेड कस्ट’ र ‘प्रोफिट’समेत जोडेर तयार गरेको विषयमा पनि उजुरी परेको छ । स्वास्थ्य कर्मचारी समायोजन प्रक्रियामा नियम मिचेको विषयमा समेत उजुरी परेको छ । त्यसबारे गुनासो नआउने गरी व्यवस्था गर्न केन्द्रले निर्देशन दिइसकेको छ ।
केन्द्रमा स्वास्थ्य सेवा विभागअन्तर्गत बाल स्वास्थ्य कार्यक्रममा ‘कमिसन’का लागि आवश्यकै नभएको ‘क्लोरहेक्जिडिन आयन्टामेन्ट’ औषधि खरिद गरिएको विषयमा उजुरी परेको थियो । यसबारे केन्द्रले भविष्यमा ‘स्पेसिफिकेसन’ सम्बन्धित उजुरी नपर्ने गरी कार्य गर्न विभागलाई निर्देशन दिइसकेको छ । केन्द्र नीति निर्माण तथा अनुगमन महाशाखा अधिकृत भोलारमण अधिकारीले गुनासो आउन नदिने गरी व्यवस्था मिलाउन सम्बन्धित मन्त्रालयलाई निर्देशन दिँदै आएको जानकारी दिए ।
‘हामीले मन्त्रालय र मातहतका कार्यालयलाई गुनासो आउन नदिने गरी नियमानुसार गर्न भनेर निर्देशन दिँदै आएका छौं,’ उनले भने, ‘पैसा हानि नोक्सानी सम्बन्धित उजुरी कतिपय अख्तियारमा समेत पठाउँदै आएका छौं । ’ केन्द्रका अनुसार स्वास्थ्य क्षेत्र सम्बन्धित २०७४/७५ मा १०२, २०७५/७६ मा ५८, २०७६ देखि हालसम्म १७ वटा उजुरी फछ्र्योट भएका छन् । राजधानी दैनिकबाट
