काठमाडौं । रामचन्द्र पौडेलले जिम्मेवार प्रेसले संघीय लोकतान्त्रिक गणतन्त्रलाई अझ सुदृढ बनाउँदै सुशासन, विकास, प्रगति र आर्थिक समृद्धिको जनचाहनालाई पूरा गर्ने अभियानमा प्रभावकारी भूमिका खेल्नुपर्ने बताउनुभएको छ ।
सूचना तथा सञ्चार प्रविधि मन्त्रालयद्वारा आयोजित पुरस्कार वितरण कार्यक्रममा सम्बोधन गर्दै राष्ट्रपति पौडेलले नेपालको राजनीतिक, सामाजिक तथा सांस्कृतिक परिवर्तनमा नेपाली पत्रकारिता जगतले खेलेको भूमिका उल्लेखनीय रहेको स्मरण गर्नुभयो ।
उहाँले संविधानले प्रेस तथा अभिव्यक्ति स्वतन्त्रताको प्रत्याभूति गरेको उल्लेख गर्दै पत्रकारलाई निर्भय र स्वतन्त्र रूपमा समाचार सम्प्रेषण गर्ने वातावरण निर्माण गर्नु राज्यको दायित्व भएको बताउनुभयो । साथै सत्यतथ्य समाचार सम्प्रेषण गरेर जनतालाई सुसूचित गर्नु जिम्मेवार प्रेसको धर्म भएको उहाँको भनाइ थियो ।
राष्ट्रपति पौडेलले पत्रकारिता परिवर्तनको वाहक र राष्ट्र निर्माणको प्रभावकारी माध्यम भएको उल्लेख गर्दै स्वतन्त्र, निष्पक्ष र तटस्थ पत्रकारिताका लागि लोकतन्त्र अनिवार्य शर्त भएको स्पष्ट पार्नुभयो । उहाँले स्वतन्त्र पत्रकारिताविना लोकतन्त्रको परिकल्पना गर्न नसकिने धारणा पनि राख्नुभयो ।
समाचार लेखेकै आधारमा पत्रकार असुरक्षित हुनुपर्ने अवस्थाको अन्त्य हुनुपर्नेमा जोड दिँदै उहाँले सुरक्षित र जोखिममुक्त वातावरणमा समाचार संकलन तथा सम्प्रेषण सुनिश्चित गर्न सबै पक्षको ध्यान जान आवश्यक रहेको बताउनुभयो ।
श्रमजीवी पत्रकारहरूको हकहित तथा सञ्चार गृहहरूको आर्थिक दिगोपनका लागि सरकार र निजी क्षेत्रबीच समन्वय आवश्यक रहेको पनि उहाँले उल्लेख गर्नुभयो ।
सामाजिक सञ्जाल र नागरिक पत्रकारिताको बढ्दो प्रयोगसँगै आधारहीन तथा मिथ्या सूचना फैलिने चुनौती थपिएको भन्दै राष्ट्रपति पौडेलले त्यसको सामना गर्न नेपाली प्रेस सक्षम हुने विश्वास व्यक्त गर्नुभयो ।
कार्यक्रममा राष्ट्रपति पौडेलले वरिष्ठ पत्रकार सम्मानबाट चन्द्रकिशोर झा र नम्रता शर्मालाई सम्मान गर्नुभयो । यस्तै भोला पासवान, उमेश श्रेष्ठ र रुपा गहतराजलाई राष्ट्रिय पत्रकारिता पुरस्कार प्रदान गरिएको थियो ।
