काठमाडौं: सम्पत्ति शुद्धीकरण र हिमालय रिइन्सुरेन्स प्रकरणमा पक्राउ परेका व्यवसायी सुलभ अग्रवाल र दीपक भट्टलाई विशेष अदालतले थप १२ दिन थुनामा राख्न आदेश दिएको छ ।
अनुसन्धान प्रक्रिया समाप्त नभएको भन्दै प्रहरीले म्याद थपका लागि विशेष अदालत समक्ष अनुरोध गरेको थियो ।
भट्टको हकमा आज पाँचौं पटक र अग्रवालको हकमा छैटौँ पटक म्याद थप भएको अदालतको आदेशमा उल्लेख छ । विशेष अदालतका न्यायाधीश हेमन्त रावल, न्यायाधीश डिल्लीरत्न श्रेष्ठ र न्यायाधीश विदुर कोइरालाको इजलासबाट म्याद थप भएको हो ।
