इङलिस क्लब आर्सनलले २० वर्षपछि पहिलो पटक च्याम्पियन्स लिगको फाइनलमा स्थान बनाएको छ। मंगलबार राति भएको खेलमा आर्सनलका फर्वार्ड बुकायो साकाको निर्णायक गोलले गनर्सलाई एट्लेटिको म्याड्रिडविरुद्ध समग्रमा २–१ ले जित दिलायो।
आर्सनलका कोच मिकल आर्टेटाको टोली गत सिजन सेमिफाइनलमा अन्तिम विजेता पेरिस सेन्ट-जर्मेनसँग पराजित भएको थियो। तर यसपटक साकाको गोलले त्यही चरणमा फेरि बाहिरिने खतरा टार्दै टोलीलाई फाइनलसम्म पुर्याएको छ। साथै, च्याम्पियन्स लिग र प्रिमियर लिग दुबै जित्ने सम्भावना अझै कायम छ।
पहिलो लेगपछि समग्र स्कोर १–१ को बराबरीमा रहेकाले आर्सनलको गृह मैदान एमिरेट्स स्टेडियममा भएको दोस्रो लेग सुरुदेखि नै तनावपूर्ण बनेको थियो।
तर खेलको ४४औं मिनेटमा साकाले निर्णायक गोल गरे। एट्लेटिकोका गोलकिपर जान ओब्लाकले लियान्द्रो ट्रोसार्डको प्रहार रोकेपछि आएको रिबाउन्डमा साकाले गोल गरेका थिए।
एट्लेटिकोले पनि केही अवसरहरू सिर्जना गरेको थियो। पहिलो हाफमा डेक्लान राइसले जुलियानो सिमियोनलाई रोक्न अन्तिम समयमा महत्वपूर्ण ट्याकल गरे।
ग्योकेरेसले अर्को गोल गर्ने राम्रो अवसर पाए पनि उनले पियेरो हिन्कापिएले दिएको क्रसलाई बक्सभित्रबाट बाहिर प्रहार गरे।
यद्यपि त्यो मौका खेर गए पनि खेलको नतिजामा असर परेन, र आर्सेनलले आफ्नो अग्रता जोगाउँदै २००६ मा बार्सिलोनासँग पराजित भएपछि पहिलो पटक फाइनलमा स्थान पक्का गर्यो।
अब आर्सेनलले मे ३० मा बुडापेस्टमा हुने फाइनलमा बायर्न म्युनिख वा पिएसजीमध्ये एकसँग प्रतिस्पर्धा गर्नेछ, जहाँ उनीहरूले पहिलो पटक च्याम्पियन्स लिगको उपाधि जित्ने लक्ष्य राखेका छन्। एजेन्सी
