काठमाडाैँ । सिरहाको गोलबजार नगरपालिका–६ नम्बर वडा कार्यालयले अब आफ्नै भवनबाट सेवा प्रवाह सुरु गरेको छ। लामो समयदेखि भाडाको घरबाट प्रशासनिक कार्य सञ्चालन गर्दै आएको वडा कार्यालयले सोमबारदेखि नयाँ भवनबाट नियमित सेवा दिन थालेको हो।
नगरपालिकाको ५० लाख रुपैयाँ लागतमा निर्माण सम्पन्न भएको भवनको सोमबार एक कार्यक्रमबीच नगर प्रमुख श्यामकुमार श्रेष्ठ र वडाध्यक्ष सञ्जित लामाले संयुक्त रूपमा उद्घाटन गरे।
उद्घाटन कार्यक्रममा बोल्दै नगर प्रमुख श्रेष्ठले आफ्नै भवन अभावका कारण विगतमा सेवाग्राहीले झेल्नुपरेका समस्या अब अन्त्य हुने विश्वास व्यक्त गरे। उनले नयाँ भवनबाट सेवा प्रवाह प्रभावकारी र व्यवस्थित हुने अपेक्षा पनि व्यक्त गरे।
भवन निर्माणका लागि स्थानीय मीनकुमार तामाङ र अमरकुमार तामाङले दुई कट्ठा पाँच धुर जग्गा निःशुल्क उपलब्ध गराएका थिए।
