काठमाडौँ। सभामुख डोलप्रसाद अर्याल र राष्ट्रिय सभा अध्यक्ष नारायणप्रसाद दाहालले संसदीय समितिका सभापतिहरूसँग छलफल गर्नुभएको छ ।
सोमवार संघीय संसदअन्तर्गत राष्ट्रिय सभा र प्रतिनिधि सभाका संसदीय समितिका नवनिर्वाचित सभापतिहरुसँग समितिको कार्यसम्पादनलाई प्रभावकारी बनाउने विषयमा छलफल गर्नुभएको संघीय संसद सचिवालयका सहसचिव एवं प्रवक्ता एकराम गिरीले बताउनुभएको हो ।
प्रवक्ता गिरीले समितिहरूको कार्यक्षमता अभिवृद्धि, देखिएका चुनौतीहरूको पहिचान तथा समाधानका उपायका लागि संयुक्त बैठक बसेको बताउनुभएको हो ।
उहाँकाअनुसार बैठकमा समिति सभापतिहरुले उजुरी व्यवस्थापन प्रणालीको कमजोर अवस्था, पर्याप्त स्रोत–साधनको अभाव लगायतका समस्याहरू सम्बोधन गर्न माग गरेका छन् ।
प्रवक्ता गिरीले भन्नुभयो, ‘राष्ट्रिय सभा र प्रतिनिधि सभाका संसदीय समितिको निर्वाचन भएको धेरै भएको छैन । नवनिर्वाचित सभापतिज्यूहरुसँग आज सम्माननीय सभामुखज्यू र राष्ट्रिय सभाका अध्यक्षज्यूको पहिलो मिटिङ थियो । संसदीय समितिलाई प्रभावकारी बनाउने विषयमा आज प्रारम्भिक छलफल गर्नुभएको हो ।
समितिको कार्यसम्पदानलाई कसरी प्रभावकारी बनाउन सकिन्छ ? के कस्ता चुनौतीहरु रहेका छन् ? कसरी समाधान गरेर जाने लगायतका विषयमा छलफल भएको हो । समिति सभापतिज्युहरुले उजुरी व्यवस्थापन तथा स्रोत र साधनको विषयमा रहेका समस्याहरु राख्नुभयो ।’
समिति सभापतिहरूलाई कानुन दु्रत गतिमा कानून निर्माणको काम अघि बढाउन सभामुख अर्यालसँगै अध्यक्ष दाहालले आग्रह गरेको उहाँको भनाइ छ । –न्युज एजेन्सी नेपाल
