काठमाडौं । नेकपा एमालेका नेता गोकुल बास्कोटाले लिपुलेक सीमा विवादको सन्दर्भमा सरकारले लिएको अडानलाई सही ठहर गरेका छन्। उनले भारतले पुरानै अडान दोहोर्याएको र चीनले यसलाई आफ्नो समस्या नभएको संकेत गर्ने गरी कूटनीतिक प्रतिक्रिया दिएको बताएका छन्।
सामाजिक सञ्जालमार्फत आफ्नो धारणा सार्वजनिक गर्दै बास्कोटाले कूटनीतिमा कसले के बोल्यो वा बोलेन भन्ने विषयमा अत्यधिक चर्चा गर्नुको खास अर्थ नरहेको उल्लेख गरेका छन्। उनका अनुसार यस्ता बहसले वास्तविक परिणाममा खासै प्रभाव पार्दैनन्।
उनले आगामी दिनमा सम्भावित कूटनीतिक गतिविधिप्रति पनि ध्यानाकर्षण गराएका छन्। विशेषगरी, ‘ग्रेटर नेपाल’ का समर्थकको रूपमा चिनिने प्रधानमन्त्री बालेन्द्र शाह (बालेन) को भारत भ्रमण भएमा नेपालको अडान र त्यसको परिणामप्रति आफूले चासोका साथ प्रतिक्षा गर्ने बताएका छन्।
नेपाल–भारत–चीन त्रिदेशीय सिमाना क्षेत्रमा पर्ने लिपुलेक क्षेत्र लामो समयदेखि विवादित रहँदै आएको छ। यस विषयमा विभिन्न राजनीतिक व्यक्तित्वहरूले आ–आफ्ना धारणा सार्वजनिक गर्ने क्रम जारी छ।
