काठमाडौँ। नेपाली राष्ट्रिय क्रिकेट टोलीका अलराउण्डर दीपेन्द्र सिंह ऐरीले टोलीको ब्याटिङमा सुधार आउनु र खेलाडीहरूबीचको आन्तरिक प्रतिष्पर्धा बढ्नु नेपाली क्रिकेटका लागि सुखद् पक्ष रहेको बताएका छन् ।
ओडिआई क्रिकेटमा आफ्नो दोस्रो शतक प्रहार गरेपछि आयोजित पत्रकार सम्मेलनमा बोल्दै ऐरीले टिमको रणनीति, युवा खेलाडीको आगमन र दर्शकको उपस्थितिका विषयमा आफ्नो धारणा राखेका हुन् । आफ्नो पछिल्लो लयका बारेमा बोल्दै ऐरीले खेलमा देखाएको एकाग्रता (फोकस) का कारण रन बनिरहेको बताए ।
खेलको अन्तिम ओभरहरूमा स्पिनरको सट्टा तिब्र गतिका बलरलाई प्रयोग गर्ने कप्तानको निर्णयको उनले बचाउ गरे । ऐरीले अभ्यासका क्रममा पनि डेथ ओभरमा तिब्र गतिका बलरहरूलाई नै विश्वास गर्ने योजना बनाएको र क्रिजमा दुईजना दायाँहाते ब्याट्सम्यान भएकाले अफ–स्पिनरका लागि सहज हुनसक्ने ठानेर कप्तानले पेस बलर नै रोजेको बताए ।
युवा खेलाडी अर्जुन कुमालको डेब्यु र अनुभवी विनोद भण्डारीको पुनरागमनलाई उनले टिमका लागि ऊर्जाको रूपमा लिएका छन् । नेपाल ‘ए’ को संरचना र आन्तरिक सिरिजहरूले गर्दा सिनियर टोलीका खेलाडीहरूलाई पनि राम्रो प्रदर्शन गर्न दबाब पुग्ने र यसले समग्र क्रिकेटको स्तर उकास्ने उनको विश्वास छ ।
मैदानमा दर्शकको संख्या घट्दै गएको प्रति ऐरीले खिन्नता प्रकट गरे । अमेरिका र भारत जस्ता देशमा खेल्दा समेत नेपाली समर्थकको ठूलो साथ पाउने गरेको स्मरण गर्दै उनले घरेलु मैदानमा दर्शक नआउनु दुःखद् भएको बताए । टिकटको मूल्य वा अन्य प्राविधिक कारणले दर्शक कम भएको हुन सक्ने भन्दै उनले समर्थकहरूको उपस्थिति र प्रोत्साहनले खेलाडीमा थप ऊर्जा थपिने उल्लेख गरे ।
सिरिजको अन्तिम खेलमा ओमानविरुद्ध सकारात्मक मानसिकता (पोजेटिभ इन्टेन्ट) का साथ मैदान उत्रने उनले प्रतिवद्धता जनाए । पछिल्ला खेलहरूमा ब्याट्सम्यानहरूले साझेदारी गरिरहेकाले आगामी खेलमा पनि सोही लयलाई निरन्तरता दिँदै सुखद् नतिजा निकाल्ने लक्ष्य टोलीको रहेको उनले बताए ।
संयुक्त अरब इमिरेट्स (युएई) का क्रिकेट टोलीका मुख्य प्रशिक्षक लालचन्द राजपूतले मध्यक्रमका ब्याटरबीच आवश्यक साझेदारी हुन नसक्दा आफ्नो टोलीले हार व्यहोर्नुपरेको बताए । खेलपश्चात् सञ्चारकर्मीसँग कुरा गर्दै प्रशिक्षक राजपूतले जितको नजिक पुगेर पनि नतिजा आफ्नो पक्षमा पार्न नसक्दा टोली केही निराश भएको उल्लेख गरे ।
राजपूतले २८९ रनको लक्ष्य पछ्याउन सकिने भएपनि मध्यक्रममा लगातार तीन विकेट गुम्नु खेलको निर्णायक मोड बनेको विश्लेषण गरे । प्रशिक्षक राजपूतले पराजयका बाबजुद तल्लो क्रमको ब्याटिङ र खेलको प्रतिष्पर्धात्मक पक्षलाई लिएर सकारात्मक प्रतिक्रिया दिएका छन् ।
बलिङतर्फको कमजोरीबारे बोल्दै उनले टोलीका एक प्रमुख बलर घाइते हुनु दुर्भाग्यपूर्ण रहेको बताए । ती बलरले पूर्ण ओभर बलिङ गर्न नसक्दा विपक्षी टोलीले करिब २० रन बढी जोड्न सफल भएको उनको तर्क छ ।
आगामी खेलका लागि टोली सकारात्मक रहेको र ओमानविरुद्धको खेलमा जित निकाल्ने लक्ष्यका साथ मैदान उत्रने उनले बताए । घाइते खेलाडीको फिटनेसका सम्बन्धमा फिजियोको रिपोर्ट आएपछि मात्र आगामी खेलको अन्तिम निर्णय लिइने जानकारी उनले दिए । हारका बाबजुद पनि दर्शकका लागि यो खेल निकै रोमाञ्चक र मनोरञ्जनात्मक रहेको उनको टिप्पणी थियो । —न्युज एजेन्सी नेपाल
