वीरगन्ज। कृषि सामग्री कम्पनी प्रादेशिक कार्यालय प्रदेश ५ का प्रादेशिक प्रमुख अजयकुमार श्रीवास्तवको नागरिकता छानबिन हुन थालेको छ । भारतीय भई जाली नागरिकता बनाएर नेपाल सरकारको उच्च पदमा जागिर खाइरहेका श्रीवास्तवको नागरिकता छानबिन हुन थालेको हो ।अख्तियार दुरुपयोग अनुसन्धान आयोगमा श्रीवास्तवको जाली नागरिकता सम्बन्धी उजुरी परेपछि अख्तियारले कपिलवस्तु जिल्ला प्रशासन कार्यालयलाई छानबिन गर्न पत्राचार गरेको खुलासा भएको छ ।
श्रीवास्तवले कपिलवस्तुबाट वंशजका आधारमा नागरिकता लिएको कुरा अहिले सतहमा आएको छ । भारत उत्तरप्रदेश घर भई राज्यलाई झुक्याएर कपिलवस्तु जिल्लाबाट नेपाली नागरिकता लिएर उनी कृषि सामग्री कम्पनीको प्रदेश ५ को प्रादेशिक कार्यालयमा कार्यरत रहेको कृषि सामग्री कम्पनीका एक कर्मचारीले नाम नबताउने सर्तमा बताए । यस सम्बन्धमा जिल्ला प्रशासन कार्यालय कपिलवस्तुका प्रमुख जिल्ला अधिकारी गजेन्द्र श्रेष्ठसँग बुझ्दा उनले अजय श्रीवास्तव कि अक्षय श्रीवास्तव ? को एउटा जाली नागरिकताबारे अनुसन्धान भइरहेको बताए ।
एउटा नागरिकता छानबिन गर्नु भनी अख्तियारबाट सूचना आएनुसार अनुसन्धान थालिएको उनको भनाइ छ । प्रादेशिक प्रमुख अजयकुमार श्रीवास्तवको वास्तविक थर श्रीवास्तव नभए पनि उनले कपिलवस्तुको बहादुरगन्जका एक नातेदारको श्रीवास्तव थरबाट नागरिकता लिन सफल भएको बुझिएको छ । गत आर्थिक वर्षमा उनकी आमाको मृत्यु हुँदा पनि उनी भारतमा नै गई आमाको काजकृया गरेर फर्किएको कृषि सामग्री कम्पनीका एक कर्मचारीले खुलासा गरे ।
‘हामीलाई पनि शंका त छ तर छानबिन गर्ने निकाय अरू नै हुँदा उहाँ उम्किरहनुभएको छ ।’नक्कली नागरिकताको सवालमा श्रीवास्तवसँग बुझ्दा उनले भने, ‘तपाईंहरूलाई यस्तो कुरा कसरी थाहा हुन्छ ? मलाई त थाह छैन, कस्ले भन्छ यस्तो कुरा ?’ उनले आफूले पनि यसबारे बुझ्ने बताए । ‘कपिलवस्तु त मेरो छिमेकी जिल्ला हो ? म पनि बुझ्छु त्यसो भए,’ श्रीवास्तवले भने । राजधानी दैनिकबाट
