काठमाडौं । नेपाल उद्योग बाणिज्य महासंघका अध्यक्ष चन्द्रप्रसाद ढकालले श्रमको सम्मान गर्दै सुरक्षित कार्य वातावरण, उचित पारिश्रमिक र सीप विकासमा थप ध्यान दिनु पर्ने जनाउनु भएको छ ।
१३७औँ अन्तर्राष्ट्रिय श्रमिक दिवसको अवसरमा सम्पूर्ण श्रमिक दाजुभाइ तथा दिदीबहिनीहरूमा हार्दिक शुभकामना व्यक्त गर्दे अध्यक्ष ढकालले श्रम नेपालको अर्थतन्त्रको मेरुदण्ड भएको उल्लेख गर्नुभयो ।
उहाँले श्रमिकहरूको परिश्रम, सीप र समर्पणले उद्योग, व्यापार र राष्ट्रिय विकासलाई गति दिएको छ जनाउदै निजी क्षेत्र श्रमिक अधिकार, मर्यादा र सुरक्षाप्रति सधैं प्रतिबद्ध छ र आगामी दिनमा अझ सुदृढ बनाउँदै लैजाने प्रतिबद्ध जनाउनु भयो ।
उहाँले भन्नुभयो “नेपालमा श्रम सम्बन्ध समग्रमा सकारात्मक र सन्तुलित दिशामा अघि बढिरहेको छ, जुन अत्यन्तै सुखद कुरा हो। उद्योग र श्रमिकबीचको सहकार्य, संवाद र पारस्परिक विश्वासले उत्पादनशीलता वृद्धि गर्नुका साथै आर्थिक गतिविधिलाई गतिशील बनाएको छ।”
अध्यक्ष ढकालले आजको दिनले हामी सबैलाई श्रमको सम्मान गर्दै सुरक्षित कार्य वातावरण, उचित पारिश्रमिक र सीप विकासमा थप ध्यान दिन प्रेरित गरोस भन्दै श्रम र पूँजीबीचको सुमधुर सम्बन्धलाई अझ मजबुत बनाउँदै समृद्ध नेपाल निर्माणमा हातेमालो गर्न आब्हान गर्नुभएको छ ।
