काठमाडौं — नेपाल नागरिक उड्डयन प्राधिकरणले त्रिभुवन अन्तर्राष्ट्रिय विमानस्थलमा आपतकालीन अभ्यास सञ्चालन गर्ने भएको छ। प्राधिकरणले जारी गरेको सूचनाअनुसार आज अपराह्न ३ बजे ‘अलर्ट–१ सम्बन्धी पूर्णकालीन अभ्यास गरिनेछ।
अभ्यासका क्रममा विमानस्थल क्षेत्रमा कालो धुवाँ, दमकल, सुरक्षा निकाय, एम्बुलेन्स तथा अन्य उद्धार टोलीको सक्रियता देखिन सक्नेछ। यसले सर्वसाधारणमा त्रास सिर्जना हुन सक्ने भएकाले पूर्वसूचना दिइएको प्राधिकरणले जनाएको छ।
प्राधिकरणका अनुसार अभ्यासमा विमानस्थलमा हुने सम्भावित दुर्घटनाको अवस्थालाई ध्यानमा राखी विभिन्न निकायबीचको समन्वय, तयारी र जिम्मेवारीको मूल्याङ्कन गरिनेछ। यसबाट आपतकालीन अवस्थामा छिटो उद्धार तथा नियन्त्रण क्षमतामा सुधार ल्याउने लक्ष्य राखिएको छ।
उक्त अभ्यासका कारण केही समयका लागि नियमित उडान तथा अवतरण सेवामा आंशिक असर पर्न सक्ने बताइएको छ। साथै, विमानस्थल आसपासका बासिन्दालाई सचेत रहन र अनावश्यक भ्रममा नपर्न आग्रह गरिएको छ।
प्राधिकरणले जनाएको अनुसार यो अभ्यास अन्तर्राष्ट्रिय नागरिक उड्डयन सङ्गठनका मापदण्ड अनुरूप सञ्चालन गरिन लागेको हो।
