काठमाडौं — शहरी विकास मन्त्रालयअन्तर्गत सिफारिस समितिको सचिवालयले काठमाडौं उपत्यका विकास प्राधिकरण (केभीडीए) को विकास आयुक्त पदमा खुला प्रतिस्पर्धामार्फत पदपूर्ति गर्न आवेदन आह्वान गरेको छ।
प्रकाशित सूचनाअनुसार इच्छुक तथा योग्य नेपाली नागरिकहरूले सूचना प्रकाशित भएको मितिले २१ दिनभित्र मन्त्रालयमा दरखास्त दिन सक्नेछन्। दरखास्त शहरी विकास मन्त्रालय, सार्वजनिक निकायका पदाधिकारीको नियुक्ति तथा मनोनयनसम्बन्धी निर्देशिका, २०७९ बमोजिम पेश गर्नुपर्नेछ।
आवेदकले सम्बन्धित क्षेत्रमा (सिभिल इन्जिनियरिङ वा अर्बन प्लानिङ) मान्यता प्राप्त विश्वविद्यालयबाट कम्तीमा स्नातकोत्तर उत्तीर्ण गरेको हुनुपर्नेछ। साथै, व्यवस्थापकीय तहमा कम्तीमा पाँच वर्षको कार्यअनुभव अनिवार्य गरिएको छ। उम्मेदवारको उमेर हद ३० वर्ष पूरा भएको हुनुपर्ने उल्लेख गरिएको छ।
त्यस्तै, नेपाल सरकार वा सरकारी लगानीमा सञ्चालित संस्था, वा कम्पनी ऐनअन्तर्गत स्थापित संस्थामा नेतृत्वदायी भूमिकामा काम गरेको अनुभव भएकालाई प्राथमिकता दिइने जनाइएको छ।
आवेदकले नेपाली नागरिकताको प्रमाणपत्र, शैक्षिक योग्यताको प्रमाणपत्र, व्यक्तिगत विवरण, कार्यअनुभवका प्रमाणपत्र तथा काठमाडौं उपत्यका विकास प्राधिकरणको सुधारसम्बन्धी व्यावसायिक कार्ययोजना (करिब ५ हजार शब्दमा) पेश गर्नुपर्नेछ।
