भारतको ओडिशामा एक अनौठो घटनाले चर्चा पाएको छ, जहाँ एक व्यक्तिले आफ्नी मृत बहिनीको कंकाल बैंकमा ल्याएका छन्। ५० वर्षीय ती व्यक्तिले बहिनीको खातामा रहेको पैसा निकाल्न यस्तो गरेको भारतीय मिडियाले जनाएका छन् ।
यो घटना ओडिशाको केओँझर जिल्लाको पटना ब्लकस्थित मालिपोसी शाखा (ओडिशा ग्रामीण बैंक) मा भएको हो। जेतु मुन्डा नाम गरेका ती व्यक्तिले प्रहरीलाई बताएअनुसार बैंकका कर्मचारीहरूले खाता धारकलाई सँगै ल्याउन भनेपछि उनले यस्तो गरेका हुन्।
उनले आफ्नी जेठी बहिनी कालरा मुन्डाको खाताबाट २० हजार भारतीय रुपैयाँ निकाल्न खोजिरहेका थिए। उनकी बहिनीको मृत्यु गत जनवरी २६ मा भएको थियो।
मुण्डाले सञ्चारकर्मीहरूसँग भने, “म धेरै पटक बैंक धाएँ, तर त्यहाँका कर्मचारीहरूले खाता धारकलाई ल्याउन भने। मैले उनी मरेकी हुन् भनेर बताए पनि विश्वास गरेनन्। त्यसपछि निराश भएर मैले चिहान खनेर कंकाल निकालेर ल्याएँ, ताकि उनको मृत्यु प्रमाणित गर्न सकूँ।”
पटना प्रहरी चौकीका इन्चार्ज किरण प्रसाद साहुले बैंकले जेतुलाई सही प्रक्रिया बुझाउन नसकेको बताए। “जेतु अशिक्षित थिए, उनी जनजाति हुन्। उनलाई ‘कानुनी उत्तराधिकारी’ वा ‘नोमिनी’ भन्ने कुरा थाहा छैन। बैंकका कर्मचारीहरूले प्रक्रिया बुझाउन सकेनन्,” उनले भने।
स्थानीय ब्लक विकास अधिकृत (बीडीओ) मानस डण्डपतले यो घटनाबारे आफूले पहिलोपटक सुनेको बताए। “आज मात्रै थाहा पाएँ, अब समाधानका लागि के गर्न सकिन्छ, हेर्छौँ,” उनले भने।
घटनापछि प्रहरीले हस्तक्षेप गर्दै जेतुलाई बहिनीको खाताबाट पैसा निकाल्न सहयोग गर्ने आश्वासन दिएको छ। साथै, कंकाललाई पुनः प्रहरीको निगरानीमा चिहानमा गाडिएको भारतीय मिडियाले लेखेका छन् । एजेन्सी
