काठमाडौं: मन्त्रिपरिषदको आज बसेको बैठकले शसस्त्र प्रहरीको महानिरीक्षक पदमा नारायणदत्त पौडेललाई नियुक्त गर्ने निर्णय गरेको छ ।
नवनियुक्त महानिरीक्षक पौडेललाई दर्ज्यानी चिन्ह यसअघिको परम्परा विपरीत प्रधानमन्त्रीले लगाइदिने सम्भावना छ । पूर्व गृहमन्त्री सुधन गुरुङले प्रहरी प्रमुखहरुलाई प्रधानमन्त्रीले दर्ज्यानी चिन्ह (फुली) लगाइ दिने गरी कार्यविधि संशोधन गरिएको बताएका थिए ।
यसअघिका शसस्त्र र नेपाल प्रहरीका महानिरीक्षकलाई गृह सचिवले दर्ज्यानी चिन्ह लगाइ दिने प्रचलन थियो ।
गृहले चाहेको कार्यविधि संशोधन भए श्री पौडेल प्रधानमन्त्रीको हातबाट दर्ज्यानी चिन्ह सहित सुशोभित हुने पहिलो आईजी हुनेछन् ।
हालका आईजी राजु अर्याल आगामी वैशाख १८ गतेबाट अनिवार्य अवकाशमा जान लागेकाले नयाँ नेतृत्व चयन गरिएको हो। अर्यालले २०७९ वैशाख १९ गतेदेखि सशस्त्र प्रहरी बलको नेतृत्व सम्हाल्दै आएका थिए। कानुनी व्यवस्था अनुसार सशस्त्र प्रहरीको आईजी पदावधि चार वर्षको हुने प्रावधान रहेको छ।
आईजी पदका लागि एआईजी नारायणदत्त पौडेलसँगै एआईजी वंशीराज दाहाल पनि प्रतिस्पर्धामा रहेका थिए। पौडेल २०७९ जेठ ६ गते एआईजीमा बढुवा भएका थिए भने दाहाल २०७९ असोज २८ गते सो पदमा पुगेका थिए। वरीयताका आधारमा पौडेल पहिलो नम्बरमा रहेकाले सरकारले उनलाई नै आईजीमा नियुक्त गर्ने निर्णय गरेको हो।
