काठमाडौं: परराष्ट्र सचिव अमृत राईको निमन्त्रणामा भारतीय विदेश सचिव विक्रम मिस्री आउँदो मे ११ (बैशाख २८ गते) मा दुई दिने भ्रमणका लागि नेपाल आउन लागेका छन् ।
नेपालमा बालेन्द्र शाह नेतृत्वमा राष्ट्रिय स्वतन्त्र पार्टीको सरकार बनेपछि भारतीय उच्च कुटनीतिज्ञको नेपाल भ्रमण हुन लागेको हो । उनले खासगरी प्रधानमन्त्री बालेन्द्र शाहलाई भारत भ्रमणको निम्तो दिने बताइएको छ ।
यद्यपि प्रधानमन्त्री शाहसँग सचिव मिस्रीको भेट हुने वा नहुने निश्चित भइसकेको छैन । प्रधानमन्त्री शाहले विगतको परम्परा विपरीत नेपाल भ्रमणमा रहेका दक्षिण एसिया मामिला हेर्ने विदेश सहायक मन्त्री समिर पल कपुरसँग भेटघाट गरेका थिएनन् ।
सचिव मिस्रीले नेपालमा रहँदा परराष्ट्र मन्त्री शिशिर खनाललाई भेट्ने कार्यक्रम रहनुका साथै भारतीय लगानीमा नेपालमा संचालित विभिन्न कार्यक्रमको समीक्षा गरिने परराष्ट्र मन्त्रालयले जनाएको छ ।
केही दिनअघि भारत भ्रमणमा रहेको नेपाली पत्रकारहरुको टोलीसँगको अन्तक्र्रियामा पनि भारतीय विदेश सचिव मिस्रीले आफूले चाँडै नेपालको भ्रमण गर्न लागेको र द्विपक्षीय विषयमा विचारविमर्श हुने जानकारी दिएका थिए ।
गत महिना मरिससमा भएको इन्डो प्यासिफिक सम्मेलनका क्रममा परराष्ट्र मन्त्री शिशिर खनाल र भारतीय विदेश मन्त्री एस जयशंकर बिच नेपालमा नयाँ सरकार बनेको अवस्थामा कुटनीतिक सक्रियता बढाउने विषयमा छलफल भएको थियो ।
