काठमाडौं । नेकपा (एमाले) उपाध्यक्ष विष्णुप्रसाद पौडेलले समयको निर्देश अनुरूप समग्र पार्टीलाई पुनर्गठन गर्न र नेपाली कम्युनिस्ट आन्दोलनलाई नयाँ ढङ्गले अगाडी बढाउन जरूरी रहेको बताउनु भएको छ ।
नेपाल कम्युनिस्ट पार्टीको ७७औं स्थापना दिवसका अबसरमा उपाध्यक्ष पौडेलले यस्तो बताउनु भएको हो ।
उहाँले नीति, नेतृत्व, संगठन र कार्यशैलीमा रहेका हाम्रा गल्ति, कमजोरीहरूलाई उद्घाटित गर्न, स्वीकार गर्न र सच्याउन जरूरी रहेको पनि जनाउनु भएको छ ।
हाँले भन्नुभएको छ हामीले सफलता र उपलब्धिको जस लिएजसरी नै पराजय र क्षतिको पनि जिम्मेवारी लिन जरूरी छ ।
सामाजिक संञ्जालमा उहाँले लेख्नुभएको छ
पार्टी स्थापनाको नेतृत्व गर्ने कमरेडहरू पुष्पलाल, नरहहादुर कर्मचार्य, निरञ्जन गोविन्द वैद्य, नारायण विलास जोशी र मोती देवीप्रति श्रद्धा र सम्मान गर्ने दिन । जनताको वहुदलीय जनवाद जस्तो युग सुहाउँदो, गतिशील र लोकतान्त्रिक सिध्दान्त प्रतिपादन गर्ने जननेता मदन भण्डारीबाट प्रेरणा लिने दिन । कम्युनिस्ट आन्दोलनका सम्पूर्ण शहीदहरू र मनमोहन अधिकारी लगायत सम्पूर्ण अग्रजहरूलाई आदरपूर्वक स्मरण गर्ने दिन । नेपाली कम्युनिस्ट आन्दोलनका उपलब्धि र कमजोरीहरूको समिक्षा गर्न,तीनबाट शिक्षा लिन र अगाडी बढ्न संकल्प गर्ने दिन ।
नेपाल कम्युनिस्ट पार्टीको स्थापना सबै प्रकारका निरङ्कुश शासनको अन्त्य, लोकतान्त्रिक शासन ब्यवस्थाको स्थापना र समृद्धि, सामाजिक न्याय र समाजवादको उद्देश्य प्राप्तीका लागि भएको थियो ।
पार्टी स्थापना देखि आजसम्म आईपुग्दा नेपाली कम्युनिस्ट आन्दोलनले असाधारण उपलब्धि हासिल गरेको छ र कहालीलाग्दो क्षति पनि बेहोरेको छ । संविधान सभाबाट संघीय लोकतान्त्रिक गणतन्त्रमा आधारित संविधान घोषणा भएपश्चातको दशक कम्युनिस्ट पार्टीले झण्डै दुइतिहाइको सरकार गठन गर्न सफल भएको दशक र नेपाली कम्युनिस्ट आन्दोलनको इतिहास कै सबैभन्दा ठूलो असफलता र पराजयको दशक बन्न पुगेको छ ।
सरकारको नेतृत्व गरेको हाम्रो पार्टी २०८२ भदौ २४ सम्म आइपुग्दा नराम्रोसंग सडकमा पछारिएको छ । फागुन २१ गते सम्पन्न निर्वाचनमा नेपाली मतदाताको अत्यधिक ठूलो हिस्साले हाम्रो पार्टीलाई अस्वीकार गरेकाछन् । हामी प्रतिनिधि सभाको प्रत्यक्ष तर्फको १६५ मध्ये ९ स्थान र समानुपातिक समेत कूल २७५ मध्ये २५ स्थानमा खुम्चिन बाध्य भएका छौं ।
हामीले कुनै द्विविधा राख्नु हुँदैन, हिजोको सफलतामा हाम्रो योगदान र योग्यताको निर्णायक भूमिका थियो र आजको असफलता र पराजयमा पनि हाम्रै गल्ति, कमजोरी र अयोग्ताको निर्णायक भूमिका छ ।
अब हामीले अविलम्ब समग्र नेपाली कम्युनिस्ट आन्दोलनको, विशेष गरी बिगतको एक दशकको र पछिल्लो पटक सरकारको नेतृत्व गर्दा देखि आम निर्वाचन सम्पन्न हुदा सम्मको वस्तुनिष्ठ र यथार्थपरक समिक्षा गर्न जरूरी छ । नीति, नेतृत्व, संगठन र कार्यशैलीमा रहेका हाम्रा गल्ति, कमजोरीहरूलाई उद्घाटित गर्न, स्वीकार गर्न र सच्याउन जरूरी छ । हामीले सफलता र उपलब्धिको जस लिएजसरी नै पराजय र क्षतिको पनि जिम्मेवारी लिन जरूरी छ । समयको निर्देश अनुरूप समग्र पार्टीलाई पुनर्गठन गर्न र नेपाली कम्युनिस्ट आन्दोलनलाई नयाँ ढङ्गले अगाडी बढाउन जरूरी छ ।
पार्टी स्थापनाको यस् ऐतिहासिक दिनमा नेकपा (एमाले) लाई लोकप्रिय, गतिशील र राष्ट्रलाई नेतृत्व गर्ने निर्णायक शक्तिमा बदल्ने सङ्कल्प गरौं । धन्यवाद ।
