युरोपेली प्रतिष्ठित फुटबल प्रतियोगिता च्याम्पियन्स लिगबाट स्पेनी महारथी क्लबहरु रियल म्याड्रिड र बार्सिलोना दुबै क्वार्टरफाइनल बाटै बाहिरिएका छन् ।
पहिलो लेगमा पनि दबाबमा परेका यी दुबै टिम दोस्रो लेगका खेलमा पनि दर्शक र खेलप्रेमीलाई निराश तुल्याउँदै कमजोर प्रदर्शन गरेर बिदा भए ।
आज राति रियल म्याड्रिडलाई जर्मन लिग बुन्डेसलिगाको शीर्ष स्थानको बायर्न म्युनिखले हरायो ।
बायर्नको गृह मैदान एलिआन्ज एरेनामा भएको दोस्रो लेगको खेलमा रियलमाथि बायर्नले ४-३ गोलले पराजित गरेको हो । यो जितसँगै बायर्न च्याम्पियन्स लिगको सेमिफाइनलमा प्रवेश गरेको छ ।
बायर्नले खेलमा झण्डै ६७ प्रतिशत समय बल आफ्नो पक्षमा राखेर रियलमाथि निरन्तर दबाब बनाएको थियो । तर पहिलो गोल भने रियलका लागि आर्डा गुलरले पहिलो मिनेटमै गरेका थिए ।
तर बायर्न निकै उत्कृष्ट फर्म र लयमा थियो । उसका लागि छैटौं मिनेटमा अलेक्जान्डर पाभ्लोभिकले बराबरी गोल फर्काए । फेरि रियलले २९ औं मिनेटमा गोल गरेर टिमलाई २-१ मा ल्यायो । दोस्रो गोल पनि आर्डा गुलरले नै गरे । रियलका लागि तेस्रो गोल केलिएन एम्बापेले ४२औं मिनेटमा गरेका थिए ।
बायर्न भने यतिमै रोकिएन । बायर्नका लागि ३८औं मिनेटमा ह्यारी केनले गोल गरेका थिए भने खेलको अन्त्यतिर ८९औं मिनेटमा डियाज र ९४औं मिनेटमा मिसेल ओलिसेले गोल गरेर सेमिफाइनलको यात्रा पक्का गरे ।
बार्सिलोना पनि एट्लेटिकसँग स्तब्ध
बार्सिलोना क्लब भने अर्को स्पेनी क्लब एट्लेटिको म्याड्रिडसँग समग्रमा ३-२ गोल अन्तरले हार व्यहोर्न बाध्य भयो । यद्यपी दोस्रो लेगको खेलमा बार्सिलोना २-१ गोल अन्तरले विजयी भए पनि पहिलो लेगको खेलमा २-० गोल अन्तरले व्यहोरेको हारका कारण क्वार्टरफाइनलबाटै बिदा हुन बाध्य भयो ।
एट्लेटिकोको गृह मैदानमा बार्सिलोनाले खेलको सुरुआतमा निकै सुन्दर खेल कौशल देखाएको थियो । खेलको ४ र २४ मिनेटमा दुई गोल गरेर बार्सिलोना खेलमा फर्कने सुरसारमा थियो ।
तर एट्लेटिकोका लागि ३१औं मिनेटमा एन्टोनियो ग्रिजम्यानले डिबक्सभित्र दिएको क्रस पासमा एडेमोला लूकम्यानले सुन्दर गोल गर्दै खेललाई २-१ मा ल्याए । तर त्यसपछि कुनै गोल हुन सकेन । पहिलो लेगमा गरेको २ गोलका कारण एट्लेटिकोले समग्रमा ३-२ गोल अन्तरले खेल जितेर सेमिफाइनलमा स्थान बनायो ।
बार्सिलोना विगत ११ वर्षमा च्याम्पियन्स लिगको फाइनलमा पुग्न सकेको छैन, र यसपटक पनि लामिन यामाल, लेवान्डोस्की जस्ता निकै प्रतिभावान खेलाडी भएर पनि टिम निराश बनेको छ । यद्यपि बार्सिलोनाले यस सिजनको स्पेनी ला लिगा जित्ने लगभग पक्का भइसकेको छ ।
आर्सनल र पिएसजी सेमिफाइनलमा प्रवेश
च्याम्पियन्स लिगमा यस पटक इङलिस क्लब आर्सनल र फ्रेन्च क्लब पिएसजी सेमिफाइनलमा प्रवेश गरेका छन् ।
आर्सनल र स्पोर्टिङ बिचको दोस्रो खेल गोलरहित बराबरीमा टुङिगए पनि समग्रमा १-० गोल अन्तरले जितेर आर्सनल सेमिफाइनलमा प्रवेश गरेको हो ।
डिफेन्डिङ च्याम्पियन पिएसजीको खेल यस सिजन पनि उत्कृष्ट देखिएको छ । पिएसजीले लिभरपुललाई समग्रमा ४-० गोल अन्तरले पराजित गरेर सेमिफाइनलमा प्रवेश गरेको छ । पिएसजीले लिभरपुललाई पहिलो लेगमा २-० र दोस्रो लेगमा पनि २-० गोल अन्तरले हराएको थियो ।
सेमिफाइनलमा चार टिमको समीकरण
च्याम्पियन्स लिगमा अब चार टिम सेमिफाइनलमा प्रवेश गरेका छन् । पछिल्लो खेल स्थिति अनुसार जर्मन क्लब बायर्न म्युनिख, स्पेनी क्लब एट्लेटिको म्याड्रिड, इङलिस क्लब आर्सनल र फ्रेन्च क्लब पिएसजी सेमिफाइनलमा पुगेका छन् ।
अब सेमिफाइनलमा आर्सनलले एट्लेटिको र बायर्नले पिएसजीसँग खेल्ने छन् । यी खेलहरु दुई लेगमा हुनेछन् ।
फाइनल खेल भने हङगेरिको बुडापेस्टस्थित पुस्कास एरेनामा मे ३०, २०२६ मा हुनेछ ।
