पोखरा: गण्डकी प्रदेशका मुख्यमन्त्री सुरेन्द्र पाण्डेले आज मन्त्रिपरिषद हेरफेर गरेका छन् ।
प्रदेश प्रमुख डिल्लीराज भट्टले आज बुधबार नै नवनियुक्त मन्त्रीहरुको पद तथा गोपनियताको शपथ गराएका छन् । नेपाली काँग्रेस र नेकपा एमालेका तर्फबाट ४/४ वटा मन्त्रालय लिएका छन् ।
पुनर्गठित मन्त्रिपरिषदमा कांग्रेसबाट जित शेरचन अर्थमन्त्री र नन्दप्रसाद न्यौपाने ऊर्जा, जलस्रोत तथा खानेपानी मन्त्री बनेका छन् । सामाजिक विकास, युवा तथा खेलकुदमन्त्री रेखा गुरुङ तथा वन तथा वातावरण नम्डु गुरुङ बनेका छन् ।
यसअघि अर्थमा डा टकराज गुरुङ, सामाजिकमा विन्दुकुमार थापा र वनमा भेषबहादुर पौडेल मन्त्री थिए ।
यसैगरी एमालेबाट गोविन्दबहादुर नेपाली भौतिक पूर्वाधार विकास तथा यातायात व्यवस्था, यशोदा रिमाल उद्योग तथा पर्यटन, लक्ष्मण पाण्डे स्वास्थ्य र भीम कार्की कृषि, भूमि व्यवस्था तथा सहकारी मन्त्री बनेका छन् । यसअघि कृषिमा पद्मा जिसी, स्वास्थ्यमा कृष्ण पाठक, भौतिकमा प्रकाश केसी र पर्यटनमा मित्रलाल बस्याल मन्त्री थिए ।
गण्डकीको मन्त्रिपरिषद् ९ सदस्यीय रहेको छ ।
तर मन्त्रिपरिषद पुनर्गठन प्रति असन्तोष जनाउँदै बाग्लुङबाट निर्वाचित प्रदेशसभा सदस्य दोर्ण कुँवरले भने प्रदेश सभा सदस्यबाटै राजीनामा दिएका छन् ।
