काठमाडौं: गृहमन्त्री सुधन गुरूङ र नेपालका लागि चीनका राजदूत चाङ माओमिङ बिच सोमबार गृह मन्त्रालयमा शिष्टाचार भेटवार्ता भएको छ।
भेटका क्रममा राजदूत माओमिङले गृहमन्त्री गुरुङलाई पदभार सम्हालेकोमा बधाई दिँदै सफल कार्यकालको शुभकामना व्यक्त गरेको गृह मन्त्रालयले जनाएको छ ।
गृहमन्त्री गुरुङले नेपाल ‘एक चीन नीति’ प्रति प्रतिबद्ध रहेको दोहोर्याउँदै नेपालको भूमिमा चीनविरुद्ध कुनै गतिविधि हुन नदिने स्पष्ट पारेका थिए । उनले नेपालको सार्वभौमिकता, स्वतन्त्रता र भौगोलिक अखण्डताको रक्षा गर्न नेपाल सरकार सक्षम रहेको र नेपाली भूमि कुनैपनि मुलुकविरुद्ध प्रयोग हुन नदिने बताएका थिए।
भेटमा नेपालमा भिसा नवीकरण नगरी (ओभर स्टे) भै अवैध रूपमा बसिरहेका चिनियाँ नागरिकहरूलाइ निष्कासनको कार्य अगाडि बढाउन आवश्यक समन्वय र सहजीकरणका लागि मन्त्री गुरूङले अनुरोध गरेको पनि गृहको विज्ञप्तिमा उल्लेख छ ।
यसैगरी, चीनको सहयोगमा सञ्चालित विकास आयोजना समयमै सम्पन्न गर्न राजदूतलाई ध्यानाकर्षण गराइएको थियो। नेपाल–चीन रेलमार्ग निर्माण तथा द्विपक्षीय व्यापार सहजीकरणका विषयमा समेत छलफल भएको जनाइएको छ।
त्यस अवसरमा, नेपाल चीन सीमाक्षेत्रमा हुने आपराधिक गतिविधि नियन्त्रणका लागि सहकार्य बढाउन गृहमन्त्री गुरूङले राखेको प्रस्तावमा चिनिया राजदूतले यस विषयमा चीन सरकार सकारात्मक रहेको तथा नेपालका सुरक्षा निकायको क्षमता विकासको क्षेत्रमा समेत सहकार्य गर्ने प्रतिबद्धता जनाएका थिए ।
यसैबीच, तातोपानी नाकाबाट आवतजावतमा समस्या भएको भन्ने समाचारप्रति गृहमन्त्री गुरुङले चासो व्यक्त गरेका थिए। त्यसबारे राजदूत चेनले चिनियाँ पक्षबाट कुनै अवरोध नभएको स्पष्ट पारेका छन्।
भेटवार्तामा नेपाल–चीनबीचको ऐतिहासिक सम्बन्धलाई थप सुदृढ बनाउँदै आगामी दिनमा सहकार्य विस्तार गर्ने सहमति भएको जनाइएको छ।
