काठमाडौँ । स्पेनका प्रधानमन्त्री पेड्रो सान्चेजले लेबनान र गाजामा अन्तर्राष्ट्रिय मानवीय कानूनको उल्लंघन भएको भन्दै इजरायलसँगको एशोसिएशन सम्झौता निलम्वन गर्न युरोपेली संघसँग माग गर्नुभएको छ ।
उहाँले युरोपेली सुरक्षाका लागि तत्काल छुट्टै सेनाको आवश्यकता औंल्याउनुका साथै लेबनानमा भइरहेको मानवीय संकटप्रति गम्भीर चिन्ता व्यक्त गर्नुभएको हो ।
यसका साथै, स्पेनिस नेताले अमेरिकी राष्ट्रपति डोनाल्ड ट्रम्पको नाटो छोड्ने धम्कीको प्रतिक्रिया स्वरूप १० वर्ष वा २ वर्षमा होइन, अहिले नै युरोपेली सेना निर्माण गर्न आह्वान समेत गर्नुभयो ।
यसअघि, स्पेनका विदेशमन्त्री जोसे म्यानुएल अल्बारेसले पनि लेबनानमा इजराययली आक्रमणको कडा आलोचना गर्नुभएको थियो । सान्चेजले यो टिप्पणी इस्रायली प्रधानमन्त्री बेन्जामिन नेतान्याहुले स्पेनमाथि इजरायलसँग कुटनीतिक युद्ध छेडेको आरोप लगाएपछि गर्नुभएको हो ।
विश्व स्वास्थ्य संगठन र अन्य मानवीय निकायहरूको तथ्याङ्कअनुसार, लेबनानमा इजरायलको आक्रमणबाट १ हजार ७ सय भन्दा बढी मानिसको मृत्यु भइसकेको छ भने झन्डै ६ हजार जना घाइते भएका छन् । देशको जनसंख्याको करिब पाँचौँ हिस्सा, अर्थात् १० लाखभन्दा बढी मानिसहरू विस्थापित भएका छन् । सिन्ह्वा/ न्युज एजेन्सी नेपाल
