काठमाडौं । ललितपुरको कृष्ण मन्दिर क्षेत्रमा भएको हत्या प्रकरणमा साहसिक भूमिका निर्वाह गर्ने प्रहरी जवान शाहाना बोहरा पुरस्कृत भएकी छन्।
चैत्र २५ गते ललितपुर कृष्ण मन्दिरमा सिर्जन नेवाङ्ग र सुमित नेवाङ्गको बीभत्स हत्या गरी हतियारसहित फरार हुँदै गरेका अभियुक्तहरूलाई एक्लै लखेटेर नियन्त्रणमा लिन सफल प्रहरी प्रभाग मंगलबजारमा कार्यरत प्रहरी जवान बोहराको साहसिक कार्यको उच्च मूल्याङ्कन गर्दै उनलाई नगदसहित सम्मान गरिएको हो।
जिल्ला प्रहरी परिसर ललितपुरका प्रमुख प्रहरी वरिष्ठ उपरीक्षक होबिन्द्र बोगटीले विशेष प्रशंसास्वरूप बोहरालाई नगद पुरस्कार प्रदान गरेका हुन्।
प्रहरी परिसरका अनुसार जटिल र जोखिमपूर्ण परिस्थितिमा देखाएको साहस, व्यावसायिकता तथा कर्तव्यनिष्ठाको कदर गर्दै बोहरालाई पुरस्कृत गरिएको हो। प्रहरी संगठनभित्र उत्कृष्ट कार्य गर्ने कर्मचारीलाई प्रोत्साहन गर्ने उद्देश्यले यस्तो सम्मान प्रदान गरिएको परिसरले जनाएको छ।
