काठमाडौं । प्रतिनिधिसभाको उपसभामुख पदमा श्रम संस्कृति पार्टीकी सांसद रूबी कुमारी निर्वाचित भएकी छिन् । प्रतिनिधिसभाको आजको बैठकमा सभामुख डिपी अर्यालले रूबी कुमारी ठाकुर उपसभामुख पदमा बहुमतबाट निर्वाचित भएको घोषणा गरेका थिए ।
उपसभामुख चयनका लागि भएको मतदानमा रूबी कुमारीले २२९ मत पाएकी थिइन् । विपक्षमा ५ र मत दिन्न भन्नेमा २२ मत परेको थियो । मतदानमा २५५ उपस्थित थिए ।
राप्रपाकी उम्मेदवार सरस्वती लामाले ५ मत प्राप्त गरेकी थिइन् ।
संविधानमा विपक्षी दलका तर्फबाट सभामुख चयन हुने व्यवस्था छ । उनलाई राष्ट्रिय स्वतन्त्र पार्टी (रास्वपा) सहित प्रतिपक्ष दल नेपाली काग्रेस र नेपाली कम्युनिष्ट पार्टीले पनि समर्थन जनाएका थिए, तर नेकपा एमाले भने मतदानमा सहभागी भएन ।
रास्वपा र श्रम संस्कृति पार्टीका सदस्य संख्या दुइ तिहाइ रहे पनि राप्रपाले अन्तिम समयमा पनि उम्मेदवारी फिर्ता नलिए पछि मतदान प्रकृयामा गएको थियो । राप्रपा संसदीय दलका नेता ज्ञानेन्द्र शाहीले देशभित्र वैदेशिक हस्तक्षेप बढेको अवस्थामा उम्मेदवारी फिर्ता नलिने बताएका थिए ।
नेपालको संविधानमा उपसभामुख पदलाइ निकै महत्वका साथ लिइन्छ । संविधान बमोजिम गठन हुने संवैधानिक परिषदमा उपसभामुख पनि रहने व्यवस्था छ । यस परिषदले राज्यका महत्वपूर्ण संवैधानिक पदहरूमा नियुक्ति सिफारिस गर्दछ ।
