काठमाडौं: राष्ट्रिय स्वतन्त्र पार्टी (रास्वपा) ले श्रम, रोजगार तथा सामाजिक सुरक्षा मन्त्री दिपक कुमार साहलाई पदबाट हटाउन प्रधानमन्त्रीसमक्ष सिफारिस गरेको छ।
पार्टीका सभापति रबि लामिछानेद्वारा हस्ताक्षरित पत्रमार्फत मन्त्री साहले पदको दुरुपयोग गरेको आरोप लगाइएको छ। पत्रअनुसार उनले लामो समयदेखि निष्क्रिय राखिएको स्वास्थ्य बीमा बोर्डको सदस्यमा आफ्नी श्रीमतीलाई नियमित गराउन भूमिका खेलेको उल्लेख गरिएको छ।
रास्वपाको केन्द्रीय अनुशासन आयोगको अध्ययनबाट उक्त कार्य पुष्टि भएको र आवश्यक कारबाहीका लागि सिफारिस गरिएको जनाइएको छ। पार्टीले यस घटनाले आफ्नो छवि, आदर्श र सिद्धान्तमा आंच पुगेको निष्कर्ष निकालेको छ।
पार्टी विधानको व्यवस्था अनुसार पदको दुरुपयोग भएको ठहर गर्दै मन्त्री साहलाई जिम्मेवारीबाट अलग गर्न र आवश्यक कारबाही गर्न प्रधानमन्त्रीलाई आग्रह गरिएको छ। साथै, स्वास्थ्य तथा जनसंख्या मन्त्री निशा मेहतालाई समेत सचेत गराउन सिफारिस गरिएको छ।
हेर्नुस् पत्र
