काठमाडौं । नेपाल प्रहरीले पशुपतिनाथ क्षेत्रमा एक फ्रान्सेली नागरिक वेवारिसे अवस्थामा रहेको भन्दै सामाजिक सञ्जालमा भाइरल भएको भिडियोबारे स्पष्टिकरण दिएको छ।
प्रहरीका अनुसार उक्त विदेशी नागरिक विगत ६ वर्षदेखि आफ्नी नेपाली श्रीमतीसँग नेपालमै बस्दै आएका थिए। आर्थिक समस्याका कारण उनले आफ्नो पासपोर्ट, मोबाइल, ल्यापटप लगायतका सामान आफू बस्दै आएको होटलमै छाडेर हिँडेका थिए।
प्रहरीले ती नागरिकलाई सुरक्षित रूपमा नियन्त्रणमा लिई अध्यागमन विभागमा बुझाइसकेको जनाएको छ। सोधपुछका क्रममा उनको कुनै सामान चोरी वा लुटपाट नभएको समेत खुलेको प्रहरीले जानकारी दिएको छ।
साथै प्रहरीले घटनाको यथार्थ नबुझी सामाजिक सञ्जालमा भिडियो वा तस्बिरहरू शेयर नगर्न आग्रह गरेको छ। केही लाइक्स वा भ्युजका लागि भ्रम र अफवाह फैलाउने गतिविधि नगर्न पनि सबैलाई अनुरोध गरिएको छ।
यस घटनासम्बन्धी भिडियो प्रहरीलाई उपलब्ध गराई जानकारी गराउने सबैलाई धन्यवाद समेत व्यक्त गरिएको छ।
