काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले उपसभामुख चयनका विषयमा पार्टीभित्र हालसम्म कुनै औपचारिक छलफल सुरु नभएको स्पष्ट पारेका छन् ।
सिंहदरबारमा सञ्चारकर्मीहरूसँग कुराकानी गर्दै उहाँले सभामुखको निर्वाचन प्रक्रिया सम्पन्न भएपछि मात्रै उपसभामुखका विषयमा छलफल अघि बढाइने बताएका हुन् । लामिछानेले उपसभामुख चयनका क्रममा संवैधानिक व्यवस्था, व्यावहारिक पक्ष र विगतका संसदीय अभ्यासलाई सन्तुलित रूपमा ध्यान दिइने उल्लेख गरे।
उनले कतिपय अवस्थामा उम्मेदवारी नै नदिने परिस्थिति पनि आउन सक्ने संकेत गर्दै अन्य दलहरूसँगको समन्वय र संसदीय प्रक्रियाको क्रमिक विकासले आगामी निर्णय निर्धारण गर्ने धारणा राखे ।
सभामुखको भूमिकाबारे टिप्पणी गर्दै लामिछानेले निर्वाचित सभामुख निष्पक्ष, मर्यादित र सबै सांसदहरूको साझा अभिभावक हुनुपर्नेमा जोड दिए । उनले सभामुखले प्रतिपक्षलाई दबाउने वा नागरिकका मुद्दा रोक्ने किसिमको व्यवहार गर्न नहुने भन्दै सचेत रहन आग्रह गरे ।
लामिछानेले भने, “हामी अहिले उपसभामुखको छलफलमा प्रवेश गरेका छैनौँ । पहिला सभामुखको काम सकौँ, त्यसपछि मात्रै उपसभामुखबारे छलफल गरौँला । संवैधानिक व्यवस्था र व्यावहारिक परिस्थितिलाई हेरेर हामी अघि बढ्छौँ । जुन स्पिरिटमा मैले संसदमा आफ्नो मन्तव्य राखेको थिएँ, पार्टी त्यही स्पिरिटमा अडिग छ । सभामुख भइसकेपछि उहाँ पार्टीको रहनुहुन्न । लोकतान्त्रिक मूल्य–मान्यतालाई व्यवहारमा उतार्नुपर्छ ।”
उनले सभामुख पदलाई कुनै राजनीतिक दलको प्रतिनिधित्व नभई सिङ्गो संसद्को नेतृत्व गर्ने जिम्मेवार संस्थागत पदका रूपमा व्यवहार गर्नुपर्ने धारणा पनि राखे ।
